SHBA duket se nuk janë kanë harruar opozitës shqiptare aktin e djegies së mandateve në 2019-ën, plus bojkotin e zgjedhjeve, ku u injoruan në këshillat e tyre për të mos e ndërmarrë këtë hap.
Eshtë Zv.Ndihmës/Sekretari amerikan i Shtetit, Matthew Palmer, njëherësh i dërguari amerikan në rajon, njeriu që dështoi të bindte Bashën që mos bëjë atë që bëri, i cili në një intervistë për VOA-an theksoi atë që e quajti “zhgënjim” nga opozita.
Duke mbrojtur Reformën në Drejtësi, pra, duke dhënë të kuptuar se rrënjët e asaj çfarë ndodhi në pranverë-verë-n e më pak se dy viteve më parë i kishte rrënjët pikërisht aty, Palmer tha:
“Ne u zhgënjyem kur opozita dogji mandatet dhe doli nga parlament. Mendoj se kjo ishte e dëmshme për demokracinë shqiptare. Është inkurajuese që opozita është e gatshme të marrë pjesë në zgjedhjet e prillit, të rimarrë rolin e saj, të marrë pjesë jo vetëm në procesin demokratik, por në institucionet që do të formohen përmes këtij procesi.
Dhe në gjithë këtë proces, do të shpresoja që edhe udhëheqja në Tiranë, edhe publiku shqiptar t’i shikojnë Shtetet e Bashkuara si miq, si partnerë, si aleatë, si mbështetës të reformës demokratike, reformës në drejtësi dhe një të ardhmeje evropiane”.
Nga ana tjetër, Palmer tha se SHBA po investohen në procesin e hapjes së negociatave me Shqipërinë.
“Në emër të Shteteve të Bashkuara mund të përforcoj dhe rikonfirmoj mbështetjen tonë të fortë për perspektivën, rrugën dhe të ardhmen evropiane të Shqipërisë.
Ne ishim shumë të kënaqur kur Këshilli Evropian ra dakord marsin e kaluar për të hapur negociatat për anëtarësim me Shqipërinë. Tani duam të shohim hapin e ardhshëm logjik, përcaktimin dhe organizimin e Konferencës Ndërqeveritare, si për Shqipërinë ashtu edhe për Maqedoninë e Veriut.
Ne vazhdojmë të shpresojmë që Këshilli Evropian javën që vjen të bjerë dakord që të ndërmarrë këtë hap tjetër logjik”, theksoi zyrtari i lartë amerikan.
Për Matthew Palmer, nuk ka asnjë arsye që Shqipëria të bllokohet në procesin e negociatave.
“Mendoj se Shqipëria ka bërë shumë. Nëse sheh çështjen e reformës zgjedhore, reformat për të cilat ishte rënë dakord, të kthyera në legjislacion në përputhje me rregullat e ODIHR-it, mjaft kohë përpara zgjedhjeve të prillit. Ishte një hap përpara dhe një fitore për demokracinë e Shqipërisë. A ka akoma për të bërë? Sigurisht. Pa dyshim në fushat e shtetit ligjor dhe reformës juridike, do të donim të shihnim që Shqipëria të bëjë më shumë.
Do të donim që Gjykata Kushtetuese të formohet dhe të gjykojë çështje, do të donim të shihnim një pakësim të çështjeve të prapambetura, rreth 35 mijë prej tyre që presin të gjykohen nga Gjykata e Lartë. Do të donim të shihnim që Byroja Kombëtare e Hetimit dhe SPAK-u të funksiononin me kapacitet të plotë dhe përparim në këtë drejtim. Kjo është një përpjekje afatgjatë. Kështu që është bërë shumë punë, ka ende shumë për të bërë, por pikëpamja jonë është se Shqipëria ka shënuar përparim të mjaftueshëm për të justifikuar hapin e mëtejshëm, Konferencën Ndërqeveritare.
Do të donim që një gjë e tillë të bëhej para fundit të presidencës gjermane”, arsyetoi Palmer. /tesheshi.com/
