Derbi i Manchesterit apo lufta Mourinjo-Guardiola, ka nisur me fitoren e betejës së parë nga djajtë e kuq. Miqësorja parasezonale që u luajt në Houston të SHBA-së, rezultoi pozitive për skuadrën e drejtuar nga The special one.
Manchester United u paraqit më mirë nga ana fizike dhe dominoi ndeshjen, edhe falë një performancë të shkëlqyer të dyshes së sulmit, Lukaku-Rashford. Ishte pikërisht belgu, blerja më e fundit e United, i cili shënoi golin e parë, pasi dribloi portierin dhe gjuajti saktë në pozicion të prirët me portën.
Madje 24-vjeçari goditi edhe një shtyllë, kur me një kontroll të mirë të topit para zonës, goditi fort duke tronditur pikën ku bashkohen dy shtyllat e portës. Djemtë e Guardiolës u paraqitën jo agresivë në fushë, ndërsa skuadra e Mourinjos, në kundërsulm, shënon edhe golin e dytë me autor Rashford.
20-vjeçari që me cfarë duket në fushë, “nuk pyet” shumë cfarë blerjesh bën ekipi, u shfaq protagoniste gjatë gjithë ndeshjes. Në këtë mënyrë, Mourinho-Guradiola janë 1-0 deri tani…pavarësisht se sezoni ende nuk ka filluar dhe ekipet ende nuk kanë marrë “kolaudimet” respektive. /tesheshi.com/
