“Qytetarët” kanë triumfuar ndaj Everton-it në shtëpi, për të shkruajtur emrin në finalen e “Capital One Cup”-it, por e kanë paguar shtrenjtë këtë sukses, ndërsa belgu Kevin De Bruyne është dëmtuar dhe ka lënë fushën. Shkalla e dëmtimit të tij do të përcaktohet sot, por mungesa e tij do të ishte një goditje si për klubin anglez, ashtu edhe për Belgjikën.
Për t’iu kthyer ndeshjes së mbrëmshme gjysmëfinale, Manchester City ia doli ta fitojë 3-1, duke përmbysur rezultatin e ndeshjes së parë, të përfunduar 2-1 për Everton-in.
Gjithsesi, fitorja nuk qe aq e lehtë, me udhëtuesit që kaluan të parët në avantazh. Barkley shënoi për Everton-in në minutën e 18-të. Fernandinho barazoi shifrat gjashtë minuta më pas, e De Bruyne dhe Aguero vulosën fitoren në pjesën e dytë me golat e tyre.
Finalja e Kupës së Ligës do të luhet më 28 shkurt në stadiumin mitik “Wembley”, e përballë do të jenë Manchester City e Liverpool-i. /tesheshi.com/
