Pep Guardiola i ishte ofruar Manchester City-t dhjetë vite më parë, pas etapës së kaluar tek skuadra nga Qatar-i, Al Ahli. Megjithëse ishte stërvitur disa ditë me skuadrën citizens, trajneri Stuart Pearce kishte vendosur më në fund për të mos e pranuar në ekip.
Gjatë një interviste në kanalin anglez BBC, Pearce tha se kishte patur mundësi që në vitin 2005 ta ketë në skuadër Guardiola-n.
“Pep kishte mundësinë të nënshkruante me Manchester City-n, pasi kishte kaluar disa ditë duke u stërvitur me ne. Por ne nuk e pranuam atë”, theksoi Pearce.
Mirëpo tani, pas më shumë se një dekade, Pearce ka një mendim ndryshe për ish-trajnerin e Barcelonës.
“Guardiola është një nga trajnerët më të mirë sot në botën e futbollit. Ai është tekniku i duhur për Manchester City-n dhe besoj se do ketë shumë sukses”, përfundoi Pearce.
Ja pra që ironia e fatit e deshi që Pep të jetë tashmë koka Manchester City-it, madje si trajneri më i paguar në botë. Edhe kur u prezantua tek klubi, ai u cilësua si ndër trajnerët më të mirë të globit për momentin, të cilin do kishte dëshirë çdo skuadër për ta patur nën drejtim. Por ja që në kushtet si futbollist, anglezët nuk menduan kështu për të. /tesheshi.com/
