Ukrainasit e Dinamos së Kievit kishin shpresuar të bënin një paraqitje të mirë në Champions League, por kanë qenë të pafat mbrëmë, pasi skuadra mike angleze ka zhvilluar një prej ndeshjeve më me nivel të sezonit.
Tejet i freskët, Mançester Siti ia doli ta mposhtte pa shumë vështirësi Dinamon e Kievit në shtëpinë e vet. Fitorja e mbrëmshme 1-3 e bën thuajse të kualifikuar Mançesterin për në çerekfinalet e Champions League-s, diçka që do të ndodhte për herë të parë për të.
Serinë e golave e hapi argjentinasi Aguero në minutën e 15-të, me dy të tjerët të shënuar nga David Silva dhe Yaya Toure. Goli i nderit për ukrainasit u shënua nga Buyalskyy në minutën e 58-të.
Në kontrast me katër golat e këtij takimi, sfida tjetër e mbrëmjes, mes PSV Eindhovenit dhe Atletikos së Madridit, u karakterizua nga shterpërsia, me pak raste kulmore e me rezultatin që nuk ndryshoi për asnjë çast nga ai i fillimit.
E dyta ndeshje rresht që Atletiko e Madridit e mbyll 0-0, duke treguar se ka goxha probleme në linjën e
sulmit, e posaçërisht në atë të organizimit në aspektin ofensiv. Gati i pathyeshëm në mbrojtje, ekipi i Diego Simeone-s e ka shumë të vështirë ta gjejë golin, çka qe e dukshme dhe në këtë takim.
Përpos kësaj, Simeone duket të ketë një kujdes të tepruar, duke mos dashur të rrezikojë për asnjë çast. Megjithëse holandezët e PSV-së luajtën me dhjetë lojtarë në njëzet minutat e fundit të lojës, pas daljes me të kuqe të Pereiro-s, pak u pa një ngulmim i shtuar i spanjollëve për të shënuar.
Përfundimi 0-0 e lë të hapur kualifikimin për të dyja skuadrat, ndonëse Atletiko e Madridit ngjan të jetë më afër çerekfinaleve të Champions League-s. /tesheshi.com/
