Ekipi i Pep Guardiola-s pati një pasdite të lehtë, duke u kualifikuar pa shumë mund për herë të parë në katër vite për në gjysmëfinalet e FA Cup-it, një prej aktiviteteve të shumta të futbollit britanik.
Ndaj Midëllsbrout pritës, Mançester Siti dominoi nga fillimi e gjer në fund të ndeshjes. Fitorja 0-2 mund të kishte qenë më e thellë nëse portieri vendas, Guzan, nuk do të kishte bërë një seri pritjesh.
David Silva shënoi që në minutën e 3-të; goli i sigurisë u realizua nga Aguero në minutën e 67-të.
“Ishim të jashtëzakonshëm nga fillimi. Ndeshja duhet të kishte marrë fund 30 minuta përpara. Duhet ta përmirësojmë këtë, por jam i lumtur. Kur sulmoni mirë, mbroni mirë. Në këtë mënyrë duam të luajmë. Më pëlqen të punoj me këta djem. Jam aq i lumtur,” deklaroi Guardiola pas takimit.
Mançester Siti pati 69 për qind të zotërimit të topit, e goditi portën kundërshtare dhjetë herë karshi tre herëve të vendasve, dhe gjuajti shtatë goditje këndi përkundër një të Midëllsbrout.
Kundërshtari i Mançester Sitit sot gjendet në pozitë të vështirë dhe në kampionatin anglez, ku renditet në vend të 18-të, në zonën që të zbret në Championship. /tesheshi.com/
