Argjentinasi 34-vjeçar, portieri rezervë i Mançester Sitit, e ish-portieri i Malagës dhe i Elçes në Spanjë, me vetëm 180 minuta të luajtura në sezonin e shkuar e në këtë të tanishmin, u kthye mbrëmë në heroin e ndeshjes finale të Kupës së Ligës.
Finalja mes Liverpulit dhe Mançester Sitit u luajt në stadiumin “Wembley”, në prani të 86.206 shikuesve. Një takim i gjallë në tërësi, me raste nga të dyja skuadrat. Rezultati do të ndryshonte në pjesën e dytë, e pikërisht në minutën e 49-të, kur Fernandinho do të shënonte për Sitin. Më pas do të pasonin sulmet e lojtarëve të Liverpulit, në kërkim të barazimit. I cili vjen shtatë minuta para mbylljes së lojës së rregullt. Coutinho shënon dhe barazon rezultatin.
E përfunduar 1-1, finalja vijoi me shtesat nga 15 minuta, që nuk sollën asgjë të re. Pë t’iu drejtuar më pas
11-metërshave, ku do të spikaste Caballero, për futjen e të cilit në lojë trajneri Pellegrini qe kritikuar fort para takimit.
Caballero do të priste tre penallti, të gjuajtura nga Lucas Leiva, Coutinho dhe Lallana. Qenë pritje spektakolare, e jo topa të përfunduar me fat në duart e tij. Falë pritjeve të Caballero-s, Mançester Siti fitoi 3-1 në 11-metërshat, duke iu gëzuar trofeut të parë sezonal.
Kjo qe fitorja e katërt e Mançester Sitit në pesë finale të luajtura të Kupës së Ligës, në 1970-ën, 1976-ën, 2014-ën dhe 2016-ën. /tesheshi.com/
