Ministrja e Shëndetësisë Ogerta Manastirlliu tha se maska edhe në rrugë me detyrim, është një gjë që po aplikohet kudo e duhet mësuar me të, për të paktën disa muaj.
“Ky është normaliteti i ri, gjithë bota është duke jetuar me rregulla”, tha ajo.
Në prezantimin e një task force ekspertësh që do të ndjekin zbatimin e rregullave në terren, ajo shtoi se “shumë vende në Evropë, botë e rajon kanë filluar vendosjen e masave agresive jo duke vajtur në mbyllje totale, por duke marrë masa për të kufizuar lëvizjen, duke vendosur maskën si një detyrim kudo jashtë shtëpisë, shoqëruar me masa administrative, me gjoba shumë të larta”.
“Ne kemi zgjedhur një rrugë që besojmë që ka më pak efekte, por është një rrugë e drejtuar nga një komitet ekspertësh; do na sjellë një ulje të numrit të infektimeve, e cila do të arrihet vetëm nëse do të zbatojmë rregullat e thjeshta.
Mbajtja e maskës kudo në ambientet jashtë shtëpisë është vendosur prej një jave dhe vihet re që qytetarët po e zbatojnë këtë masë, edhe pse ka mes tyre që refuzojnë që ta bëjnë pjesë të rutinës së tyre dhe nevojitet akoma më shumë ndërgjegjësim për të zbatuar këtë rregull, për të ditur se si vendoset, sepse është mjeti më efikas dhe ka sjellë në ato vende ku është përdorur një reduktim të përhapjes së infektisonit shoqëruar me distancën dhe masat e higjienës”, tha Manastirliu. /tesheshi.com/
