Ekipi i “djajve të kuq” bëri një hap prapa dje në synimet për t’u renditur në katër vendet e para të Premier League-s në fund të sezonit. Manchester United-i la tre pikë në fushën e West Bromwich-it, ku humbi 1-0.
“Eshtë një moment shumë i keq për ne, dhe, për mendimin tim, ishte një humbje e panevojshme. Nuk dua të them se ne merituam të fitonim, por nuk merituam të humbnim,” u tha Van Gaal gazetarëve në konferencën e shtypit.
Tekniku gjaknxehtë holandez çmoi se dalja me karton të kuq e Juan Mata-s në minutën e 26-të ishte pika kyçe e kthimit të lojës, teksa ekipi i tij luajti me dhjetë lojtarë për më tepër se një orë.
“Luajtëm për 60 minuta me dhjetë lojtarë kundër njëmbëdhjetë, e kjo është gjithmonë e vështirë…. Vendimi [i kartonit të kuq] ishte pika e kthesës në ndeshje.”
Humbja e djeshme e lë Manchester United-in në vend të gjashtë dhe i bën akoma më të diskutueshme pozitat e Van Gaal-it. /tesheshi.com/
