Skuadra e Pep Guardiola-s është kthyer te fitorja në Premier League, teksa trepikëshi i fundit i përkiste 24 shtatorit.
Seria negative ka përfunduar me një fitore të thellë e të pastër në transfertën e Uest Bromuiçit. Aguero do t’i jepte qetësi ekipit me dy golat e tij që në 30 minutat e para të lojës. Ilkay Gündoğan e çoi në 0-4 rezultatin me dy golat e tij në dhjetë minutat e fundit.
Fitorja e kthen Mançester Sitin në vend të parë në kampionatin anglez në javën e dhjetë të tij.
Në ndeshjen hapëse të javës, fitore të thellë siguroi dhe Arsenali në transfertën e Sandërlendit. Rezultati qe 1-1 kur Giroud u fut në lojë për “topçinjtë” në minutën e 69-të. Francezi shënoi në prekjen e parë të topit dy minuta më pas, e fare pak më tutje shënoi dhe një tjetër gol. Alexis Sanchez shënoi po ashtu golin e tij të dytë kur fiksoi shifrat 1-4.
Mançester Junajtedi dhe Bërnli u detyruan të kënaqen me nga një pikë pas barazimit 0-0 në “Old Trafford”.
Po në barazim, por 1-1, përfundoi dhe sfida Totenhem – Lestër Siti. /tesheshi.com/
