Nga Ylli Pata
Gazetari i njohur britanik që merret me çështjet e Ballkanit, Tim Judah, shkruan në twitter-in e tij si diçiturë të fotos së Angela Merkelit në Samitin e Parisit: “Mami mbërriti në takimin e vendeve të Ballkanit Perëndimor.”
Një metaforë e stilizuar me rolin direkt të Gjermanisë në këtë proces që ka nisur prej dy vitesh me Samitin e Berlinit, por që deri tani ka prodhuar vetëm projekte, e asnjë “lek në dorë”.
Një burim i rëndësishëm diplomatik europian në Tiranë i tha faqes tesheshi.com se procesi i Berlinit nuk ka të bëjë me “cash”-in që do t’u jepet dy qeverive. Por bëhet fjalë për para që do të menaxhohen thuajse direkt nga Berlini për ndërmarrje dhe sipërmarrje të cilat do të ndikojnë në lidhjen ekonomike të rajonit, por që janë në vetvete investime gjigande gjermane.
Dhe, në fakt, janë parashikuar një numër i madh investimesh gjermane në Ballkan, kryesisht në Shqipëri, Kosovë dhe Serbi.
Përveç rrugës Podgoricë-Janinë, e cila pjesën e luanit e ka në Shqipëri, siç dhe emërtohet “Autostrada e Kaltër”, pasi kalon në bregdet, dy nga projektet gjermane kanë të bëjnë me hekurudhën shqiptare dhe lidhjen energjitike Shqipëri-Kosovë.
I gjithë investimi i lidhjes energjitike mes Shqipërisë dhe Kosovës, që sapo u inaugurua, është investim direkt gjerman, i menaxhuar nga një kompani gjermano-kroate.
Një konsorcium i madh gjerman është ngritur pranë aeroportit të Rinasit, i cili ka magazina, hotele, restorante, dhe zyra ligjore e fiskale për bizneset e mëdha që pritet të vërshojnë në këto tre vende të rajonit.
Ndërkaq, ajo që është më e rëndësishmja, dhe që nuk përdoret nga palët për konsum të brendshëm, është ultimatumi i dhënë nga kancelarja Merkel për Beogradin, Prishtinën dhe Tiranën.
Këto vende duhet t’i lënë provokacionet kundër njëri-tjetrit, që rrisin koston e sigurisë për Europën dhe e frenojnë bisnesin për t’i kryer investimet që pritet të sjellin fitime për të gjithë, por në radhë të parë për korporatat e mëdha gjermane.
Për të siguruar një ambient të qetë, Merkel i ka urdhëruar Edi Ramën dhe Aleksandër Vuçiqin, dy kryeministrat të cilët i mbështet fort, që të ndërmarrin një nismë të paparë ndonjëherë mes dy shteteve në armiqësi shekullore.
Duke nisur nga vjeshta, në Tiranë dhe në Beograd do të zhvillohen çdo dy muaj konferenca shqiptaro-serbe, ku politikanë, ekonomistë, veprimtarë të medias dhe të shoqërisë do të shkëmbejnë mendime për realizimin e projekteve të përbashkëta, që do të financohen nga Brukseli nën ndikimin e Berlinit.
Samiti i Parisit vendosi që në Tiranë të ngrihet zyra e përbashkët e bashkëpunimit të rinisë, ku do të hartohen lista të legalizuara punësimi për në Gjermani, për fuqi punëtore dhe profesione që do të kërkojë tregu gjerman, si dhe do të financohen projekte të përbashkëta për promovimin e bashkëpunimit dypalësh.
Kryeministri serb, Vuçiq, deklaroi pas takimit me Edi Ramën në Paris se, “Beogradi synon që të promovojë bashkëpunimin, ndaj autostrada Nish-Prishtinë do t’i japë biznesit serb një port të madh, siç është Durrësi, për të dalë në tregun europian.”
Ndërkaq, së shpejti do të hapet një linjë ajrore direkte mes Beogradit dhe Prishtinës, e cila do të promovohet nga Komisioni Europian.
Kjo do të bëhet kur Beogradi ta rrëzojë nenin famëkeq për Kosovën në Kushtetutë dhe ta njohë dhe de jure shtetin e Kosovës.
“Mazhoranca parlamentare e sotme në Serbi është e mbështetur nga Berlini. Ka porosi të qarta se Vuçiq nuk duhet të promovojë ekstremistët, por liberalët, në qeveri. Edhe shqiptarët e Preshevës që do të përfaqësohen në ekzekutiv janë një fakt konkret mbi ndikimin europian,” tha për tesheshi.com një diplomat i rëndësishëm, i cili zgjodhi të mos ta bëjë të njohur identitetin. /tesheshi.com/
