Janë përkujtuar 15 maturantët nga Malisheva, të cilët 13 vite më parë, tragjikisht humbën jetën në një aksident rrugor në Fushë Arrëz të Shqipërisë.
Përmes homazheve në varrezat e tyre, janë përkujtuar nxënësit: Berat Suka, Esat Hajrullahu, Elgadaf Zabelaj, Mifail Morina, Rifat Hoxha, Xhevdet Sertolli, Visar Kafexholli, Agron Berisha, Ajet Rrahmanaj, Esat Rexhaj, Labinot Morina, Lulzim Kastrati, Megezon Sadiku, Rruhi Ulluri dhe Xhevet Sahitaj.
Krahas familjarëve dhe ish-maturantëve të aksidentuar, homazhe, kanë bërë edhe kryetari i Malishevës, Ragip Begaj, i shoqëruar nga drejtorët e drejtorive dhe zyrtarë tjerë komunal, zv. ministri në Ministrinë e Bujqësisë, Vesel Krasniqi, përfaqësues të subjekteve politike, përfaqësues të gjimnazit në Malishevë dhe qytetarë të shumtë.
“Kjo ishte një ditë e dhimbjes për të gjithë ne, e sidomos për familjarët, e kësaj dhimbjeje ju bashkëngjit e tërë Kosova dhe Shqipëria dhe të gjitha trojet shqiptare, për të na lehtësuar dhimbjen, në atë ditë. Ju familjar, qëndroni të fortë”, tha Begaj.
Ndërsa në emër të familjarëve, të gjithë të pranishmit, i ka falënderuar Osman Suka, prindi i ish maturantit Berat Suka. /tesheshi.com/
