Rusia ka reaguar sërish ashpër pasi Mali i Zi ka nënshkruar këtë javë protokollin për anëtarësim në NATO.
Zëdhënësi i Kremlinit, Dimitri Peskov, në mënyrë të tërthortë deklaroi se “pranimi i Malit të Zi në NATO nuk i kontribuon sigurisë në Evropë, por, përkundrazi, mund të rrisë tensionet në kontinent”.
Ndërkaq, Andrej Klimov, pjesëtar i Komitetit për Marrëdhënie me Jashtë të parlamentit rus ka shkuar më tej kur tha se “ Nëse anëtarësohet në NATO, Podgorica hyn në kategorinë e caqeve potenciale të Rusisë.
Por ish-shefi i diplomacisë malazeze, Branko Llukovac, nuk u shqetësua, pasi ai tha se deklaratat e Moskës zyrtare janë thjesht rutinore.
“Duhet të dimë se para së gjithash, bëhet fjalë për qëndrim të vazhdueshëm negativ të Rusisë ndaj zgjerimit të NATO-s.
Bëhet fjalë për atë pjesë të Ballkanit që e ka konsideruar zonë të interesit dhe ndikimit”, tha Llukovac.
Por, sa ka mundësi Moska ta ndëshkojë ekonomikisht Malin e Zi?
Pas falimentimit të Kombinatit të Aluminit në Podgoricë në vitin 2013 dhe largimit të oligarkut rus, Oleg Deripaska, i cili qysh në vitin 2005 ka menaxhuar me këtë kompani, Rusia nuk ka instrumente të drejtpërdrejta ekonomike, me të cilat mund të ndikojë në zhvillimet sociale dhe politike në Mal të Zi.
Një portal rus i turizmit, Tutu.ru, ka shkruar se Mali i Zi është destinacioni më popullor për turistët rusë në qershor.
Rusët, mbeten të pranishëm në Mal të Zi, por ata janë kryesisht pronarë të patundshmërive, të cilat i kanë blerë deri në vitin 2008. /tesheshi.com/
