Banorët e Thethit i janë ankuar gruas në ikje si shefe e BE-së në Tiranë, Romana Vllahutin, ku theksin e kanë vënë të ai që për shumëkënd në Shqipëri konsiderohet dhe si ligj famëkeq, 7501-shi i ndarjes së pronave, miratuar e mbajtur “në jetë” si rallë ndonjë ligj deri me sot në pluralizëm, me konsensus nga dy kahjet politike.
Ndaj dhe znj. Vllahutin që udhëtoi drejt veriut turistik e u takua me banorët, përcolli këtë apel: “Roli i shtetit është thelbesor, këtë diskutuam edhe me banorët. Kryesorja dhe gjëja e parë që duhet zgjidhur, pasi ka mjaft sensitet është çeshtja e pronësisë. Që në hapat e parë kur parlamenti miratoi vite më parë ligjin 7501, banorët këtu ishin kundër dhe refuzuan ta zbatojnë. Kjo pasi ata dijnë kufijtë e tokave të të parëve, pra e kanë të qartë kush, si dhe me kë janë fqinj. Eshtë emergjente kjo zgjidhje sepse ata nuk mund të përfitojnë nga asnjë grant i BE-së, si p.sh. fondet IPARD. Por kjo është e rëndësishme edhe për investitorët që duan të vijnë këtu, pasi pa çertifikatë pronësie nuk mund të bësh asgjë”, raporton Ora News.
Diplomatja vuri theksin dhe te infrastruktura dhe energjia elektrike, dy mungesa të tjera të mëdha për zonën.
“Nga ana tjetër, infrastruktura është kryesore. Për 8 muaj rruga është e pakalueshme, pasi bllokohet nga dëbora, e 4 muaj të tjerë të duhet një makinë e mirë të vish, pasi është shumë e amortizuar. Energjia elektrike është gjithashtu problem, rrjeti i amortizuar dhe luhatjet e tensionit. Voltazhi i ulët prish pajisjet, por së dyti pengon biznesin të zhvillohet siç duhet. Njerëzit këtu kanë ide të qarta si duan të punojnë, ta zhvillojnë këtë hapësirë, e të ruajnë tradicionalen, atë që kanë trashëguar e që është thesar i zonës. Pra nevojitet një ndihmë sa më parë. Qeveria, pushteti vendor duhet të krijojnë mundësi zhvillimi”, tha zyrtarja e lartë e Brukselit. /tesheshi.com/
