Qeveria malazeze shpalli tre ditë zie kombëtare pas ngjarjes së rënë në Cetinje, ku 34-vjeçari Vuçko Boriloviç vrau 11 persona, mes tyre katër fëmijë dhe plagosi gjashtë qytetarë të tjerë.
Siç mëson RTCG, tragjedisë i ka paraprirë një konflikt familjar për çështje qeraje, pas së cilës sulmuesi ka qëlluar rastësisht dhe kalimtarët në rrugë, derisa është vrarë dhe vetë, pasi ka shkaktuar një masakër.
Më saktë, gjuthçka ka nisur nga një konflikt për qiranë e banesës. Autori Vuçko Boriloviç hyri në banesën e qiramarrësve të tij rreth orës 15:30 dhe vrau një fëmijë 11 vjeç. Pas tij vrau edhe vëllain tre vjet më të vogël dhe plagosi nënën e tyre, të identifikuar si Natasha Pajoviç.
Pas ngjarjes telefonoi bashkëshortin e saj Millosh Martinoviç për t’i rrëfyer krimin duke i thënë: “Unë kam vrarë familjen tënde dhe timen”. Në 45 minutat pasuese, në një distancë totale prej 80 metrash nga shtëpia e tij vrau dhe 7 të tjerë.
Konkretisht, pasi përfundoi telefonatën me Martinoviç, me armë gjahu në dorë, hyri në shtëpinë e fqinjëve të tjerë duke vrarë të moshuarit Danijela dhe Dimitrije Dreçun dhe plagosi rëndë nipin e tyre Aleksandar Dreçun. Më pas vrau dhe djalin e tyre Rajko Dreçun, i cili vrapoi menjëherë drejt shtëpisë kur dëgjoi të shtënat.
Masakra nuk përfundoi këtu, pasi 34-vjeçari vrau edhe fqinjin Milan Mitroviç dhe dajën e tij Goran Gjurishiç dhe më pas, duke zbritur në rrugë, nuk ndali të shtënat dhe qëlloi për vdekje fqinjët Aleksandra dhe Danijela Radunoviç.
Përveç nënës që ishte qiramarrëse në shtëpinë e tij, plagosi edhe katër persona të tjerë dhe policin Ljubisha Maksimoviç, i cili po përpiqej ta izolonte. Ndonëse ishte i rrethuar nga policia, autori nuk pranonte të dorëzohej. Sipas mediave malazeze, ndërhyri një prej fqinjëve dhe e qëlloi për vdekje.
Kjo është cilësuar si ngjarja më e rëndë e ndodhur ndonjëherë në Mal të Zi. /tesheshi.com/
