Shoqata e malazezëve të Kosovës përmes një komunikate për mediat ka mirëpritur fjalimin e ambasadores Vlora Çitaku në Këshillin e Sigurimit të Kombeve të Bashkuara, të mbajtur ditë më parë, ku theksoi se “Kosova është shtet i pavarur që u përket të gjithë qytetarëve të saj pa dallim etnie”.
“Fjalët e ambasadores Vlora Çitakut, të mbajtur në mbledhjen e Këshillit të Sigurimit të KB, se Kosova është shtet i pavarur që u përket të gjithë qytetarëve të saj – shqiptarëve, serbëve, malazezëve, romëve, turqve dhe gjithë të tjerëve është konfirmim i përkushtimit të sinqertë dhe i gatishmërisë së institucioneve se komuniteti malazez brenda një afati sa më të shkurtër të bëhet kategori kushtetuese.
Fjalët e saj në organin më të rëndësishëm të Kombeve të Bashkuara na bëjnë të besojmë dhe konfirmojnë se përpjekjet tona dhe mundi i investuar për zgjidhjen e pozitës kushtetuese juridike dhe përfaqësimin adekuat në Kuvendin e Kosovës nuk kanë qenë të kota. Misioni që ka filluar Shoqata e Malazezëve të Kosovës pa dyshim do të përmbyllet me sukses dhe mbi të gjitha do të arsyetojë ekzistimin tonë”, thuhet në komunikatë.
Më tej malazezët e Kosovës thonë se pajtohen plotësisht me ambasadoren Çitaku se ringjallja e idesë për zgjidhje sipas vijës etnike është e rrezikshme për rajonin dhe si e tillë madje as që duhet të shqyrtohet, por duhet të hidhet poshtë. /tesheshi.com/
