Republika e Kosovës ka përmbyllur në gusht të vitit të kaluar procesin e Demarkacionit me Malin e Zi, pas nënshkrimit në Vjenë të marrëveshjes për kufirin shtetëror.
Megjithëse subjektet opozitare, me theks të veçantë partia e Ramush Haradinajt (AAK-ja), janë duke kundërshtuar këtë marrëveshje, ndryshe mendojnë partitë e koalicionit LDK dhe PDK.
Mirëpo, për herë të parë ka ardhur reagimi edhe nga përfaqësuesit e Malit të Zi në Kosovë.
Kryetari i Shoqatës së malazezëve të Kosovës, Slobodan Vujiçiç, ka thënë se komuniteti i tyre mbështetë fuqishëm marrëveshjen për demarkacionin të nënshkruar ndërmjet dy shteteve.
Sipas tij, kuvendi duhet sa më shpejt ta ratifikojë dhe për këtë çështje të pajtohen edhe subjektet opozitare – Vetëvendosje, AAK dhe Nisma për Kosovën.
“Malazezët e Kosovës si qytetarë luajal të Republikës së Kosovës mbështesin plotësisht marrëveshjen e nënshkruar për demarkacionin e kufirit ndërmjet Kosovës dhe Malit të Zi dhe konsiderojnë se duhet sa më parë të ratifikohet në kuvend, sepse kjo është në interes të ndërsjellët të dy shteteve fqinje. Kujtojmë që opozita në rastin e demarkacionit të kufirit duhet të jetë konstruktive dhe pa dilemë të mbështesë këtë marrëveshje nga shkaku që kjo është në interesin e përgjithshëm të qytetarëve të Kosovës”, ka thënë Vujiçiç në një prononcim për Indeksonline.
Më tej ai thotë se ratifikimi i marrëveshjes është zgjedhja më e mirë për vazhdimin e marrëdhënieve fqinjësore ndërmjet dy shteteve dhe të respektimit të marrëdhënieve të plota bilaterale, saktësisht ngritjes së nivelit për rregullimin e përhershëm në nivel të ambasadorëve.
“Kjo paraqitje nuk është vetëm në interesin e Kosovës dhe Malit të Zi, por edhe në interes të rajonit, paqes dhe integrimit e plotë në familjen euro-atlantike”, ka thënë kryetari i malazezëve të Kosovës. /tesheshi.com/
