Shoqata e malazezëve të Kosovës ua ka dërguar një kërkesë institucioneve të Kosovës dhe të Malit të Zi që rruga Plavë – Deçan, Deçan – Plavë të emërohet me emrin Radovan Zogoviç, poet malazez i shekullit 20–të i varrosur në varret e Deçanit.
Sipas deklaratës që e ka nënshkruar kryetari i Shoqatës, Slobodan M. Vujiçiq, emërimi i kësaj rruge do të ishte konfirmim i marrëdhënieve të mira fqinjësore ndërmjet Malit të Zi e Kosovës, por edhe konfirmim se malazezët e shqiptarët nuk kanë harruar të mirat e tij si dhe veprat e tij letrare e njerëzore.
Radovan Zogoviç, thuhet në deklraratë, është shenja mbrojtëse e malazezëve autentikë nga Kosova e vepra e tij letrare është testament dhe udhë rrëfim për të gjithë njerëzit vullnet mirë.
Kujtojmë se për vite të tëra një rrugë në lagjen “Pejton” në Prishtinë u quajt “Radovan Zogoviç” dhe më pas u quajt Lorenc Antoni, për cka ngjalli reagimin e malazezëve të Kosovës të cilët e quajtën akt barbar të udhëheqjes së Prishtinës. /tesheshi.com/
