Saifudin Abdullah, Ministër i Punëve të Jashtme të Malajzisë, tha se vendi i tij nuk do të organizojë më asnjë aktivitet në të cilin do të jetë i pranishëm Izraeli.
Ministri malajzian shtoi se qeveria konfirmoi se zyrtarët izraelitë nuk do të lejohen të hyjnë në vend as për sport e as për ngjarje të tjera.
Përveç kësaj, sipas Associated Press, Malajzia ka vendosur të mos organizojë ndonjë ngjarje që do të përfshijë Izraelin në të ardhmen, duke “konfirmuar qëndrimin e qartë të qeverisë për çështjen izraelite”.
Malajzia, e cila siguron mbështetje të fortë për Palestinën, është një nga vendet me shumicë muslimane që nuk ka marrëdhënie diplomatike me Izraelin.
Muajin e kaluar, Kuala Lumpur tha në një deklaratë se “fuqimisht” kundërshton vendimin e diskutueshëm të Australisë për të njohur Jerusalemin Perëndimor si kryeqytetin e Izraelit.
Malajzia, e cila mbështet një zgjidhje mes dy shtetesh për t’i dhënë fund konfliktit izraelito-palestinez, e quajti masën “të parakohshme” dhe “degraduese ndaj palestinezëve dhe luftës së tyre për vetëvendosje”. /tesheshi.com/
