Shpresat e madrilenëve për të fituar kampionatin spanjoll kanë marrë një goditje tjetër këtë pasdite kur ata janë mjaftuar me një barazim në fushën e Malagës.
I menduar si një kundërshtar i kalueshëm, Malaga i ka surprizuar miqtë e Realit të Madridit, duke u rrëmbyer atyre një barazim. Për Realin mund të quhet një pikë e fituar, e jo dy pikë të humbura, pasi vendasit kishin mundësi dhe ta fitonin ndeshjen, teksa nuk arritën t’i finalizonin një seri rastesh.
11-metërshi i humbur nga Ronaldo në minutën e 36-të qe pika e kthesës së ndeshjes, ndërsa vetëm tre minuta më herët portugezi i kishte kaluar të tijtë në epërsi. Kameni u bë kështu portieri i katërt që i pret penalltinë Ronaldos në kampionat.
Reali i Madridit e mbylli në epërsi pjesën e parë, por në të dytën vuajti presionin e vazhdueshëm të vendasve, që e shënuan golin e barazimit në të 66-ën minutë. Albentosa u tregua i saktë, dhe Malaga rivuri ekuilibrin në fushë.
Pavarësisht rasteve të vendasve, e tërë ndeshja u mbyll 1-1. Ky ishte barazimi i tretë i madrilenëve në transfertë që nga janari. Valencia dhe Real Betis janë dy ekipet e tjera të La Ligës që e kanë ndalur Realin e Madridit.
Madrilenët ngjiten përkohësisht në vend të dytë në klasifikimin e kampionatit spanjoll, me po aq pikë sa ka dhe Atletiko e Madridit e vendit të tretë. Por Atletiko do të luajë sonte ndaj Vilarealit, e një fitore apo barazim e zbret sërish Realin një vend më poshtë. /tesheshi.com/
