Agjencia e Sigurisë Kombëtare e Malit të Zi njoftoi se pas sulmit kibernetik ndaj institucioneve të saj qëndrojnë disa shërbime ruse, raportuan të premten mediat malazeze, me vlerësimin se ishte kulmi i një lufte hibride.
Agjencia thekson se ekziston frika se kulmi i sulmit nuk është arritur ende dhe se e gjithë “infrastruktura kyçe”, si sistemi energjetik apo furnizimi me ujë, mund të jenë në shënjestër.
Ai thekson se ky është një sulm që nuk është kryer askund tjetër dhe se metodologjia e sulmit është karakteristikë e shërbimeve ruse.
Qeveria njoftoi pak më herët se Mali i Zi është ekspozuar ndaj një serie të re sulmesh kibernetike të organizuara në infrastrukturën e tij IT që nga mbrëmja e së enjtes.
“Edhe pse aktualisht disa shërbime janë të çaktivizuara përkohësisht për arsye sigurie, siguria e qytetarëve dhe subjekteve ekonomike dhe të dhënave të tyre nuk kërcënohet në asnjë mënyrë. Mali i Zi ka informuar aleatët e tij ndërkombëtarë për detajet e sulmit, të cilat janë shumë të ngjashme me ato të 2015 dhe 2016,” tha qeveria.
Shërbimet ruse sulmuan sistemin e informacionit të qeverisë malazeze në vitin 2015 dhe 2016, në prag të anëtarësimit të Malit të Zi në NATO.
Kryeministri malazez në mandat teknik, Dritan Abazoviç, ka thirrur një seancë të Këshillit të Sigurisë Kombëtare për shkak të sulmeve kibernetike.
Në një fjalim për media, ai vlerësoi se sulmet e fundit në serverët e qeverisë ishin të motivuara politikisht dhe konfirmoi se këto ishin “sulme shumë të rënda”. /tesheshi.com/
