Administratat e disa shkollave malazeze u kanë bërë thirrje prindërve sot që t’i marrin fëmijët e tyre më herët pas disa raportimeve për bomba të supozuara në shkolla.
Më herët, administrata e Podgoricës, kryeqyteti i Malit të Zi, ka marrë një paralajmërim me e-mail, që pretendohet se është mbështetur nga organizata ruse “Shteti i Burrave”, e udhëhequr nga ekstremisti Vladislav Pozdnjakov. Sipas disa mediave malazeze, ai ndodhet prej javësh në Mal të Zi, ndërsa policia pretendon se nuk ka informacion për këtë.
Drejtoritë e shkollave, në marrëveshje me prindërit e tyre, vendosën të ndërpresin mësimin për shkak të një mesazhi kërcënues që ka mbërritur në adresën elektronike të autoriteteve të Podgoricës dhe Ministrisë së Brendshme.
Çfarë thotë posta?
Në mesazh thuhet se ata kanë një sërë kërkesash, si ndryshimi i qeverisë në Mal të Zi dhe ndryshimi i udhëheqjes së Agjencisë Kombëtare të Sigurisë dhe se në rast mospërmbushjeje do të “hedhin në erë shkollat”, raportojnë mediat. Ministria e Arsimit e Malit të Zi tha se shkollat ishin urdhëruar të ndiqnin rekomandimet e Ministrisë së Brendshme.
“Pas raportimit të bombës në disa shkolla, drejtorët e shkollave kanë marrë të gjitha masat e nevojshme dhe fëmijët janë të sigurt. Vlerësimi i situatës së sigurisë është përgjegjësi e Ministrisë së Brendshme”, tha ministria.
Policia tha se janë duke ndërmarrë të gjitha masat dhe veprimet në kompetencë të tyre dhe se së shpejti do të dalin me një deklaratë.
Çfarë është “Shteti i Burrave”?
Vladislav Pozdnyakov është një krah i djathtë rus dhe drejtues i organizatës online “Men’s State”, së cilës iu ndalua puna në Rusi në mesin e vitit të kaluar për shkak të ekstremizmit.
Në vitin 2018, Pozdnyakov u dënua me dy vjet burg për nxitje të urrejtjes kundër grave, pas së cilës u largua nga Rusia.
Së fundmi ai ka publikuar në rrjetet sociale foto nga Mali i Zi. Ky vend iu bashkua sanksioneve të BE-së kundër Rusisë dhe dënoi agresionin rus kundër Ukrainës. /tesheshi.com/
