Spartak Ngjela, i njohur ndryshe dhe si “avokat Ngjela”, ka bërë pjesë të narrativës së tij të zakonshme elementin “otoman”, duke i dhënë një ngarkesë pezhorative për çdo temë të trajtuar, për të cilën zgjedh ta ketë prezente, edhe kur nuk ka asnjë arsye logjike ta bëjë këtë.
Ndryshe, kjo përkthehet dhe si “maksveloizim” i avokatit, ku siç dihet piktori dhe arkitekti i njohur e vuan si fobi otomanizmin, duke e gjetur atë si shkaktare të çdo paudhësie në këtë botë.
Dhe kjo lloj sëmundje po shfaqet së fundi dhe tek Ngjela. Në statusin më të fundit në FB, aty ku flet për efektet e reformës në Drejtësi, avokati, pa u rrekur fare të sqarojë se ç’lidhje ka otomanizmi me këtë reformë, e përfshin atë në fund të trajtesë së tij, gjë që bie tejet në sy si një ndërfytje irracionale, gjë e cila mund të hajë shpjegim vetëm e kuptuar si sëmundje.
Statusi:
Midis fyerjes së përditshme që i bëhet të ndershmit dhe të diturit, dhe fyesëve të pushtetshëm të tyre, qëndron – nënshtrimi për bukën e gojës.
Midis padrejtësisë dhe drejtësisë qëndron – koburja.
Midis dijes që përbuzet dhe injorancës që sundon, qëndron – shitja e diplomave të paditurve që do sundojnë.
Midis atyre që e duan Shqipërinë dhe atyre që e shesin çdo ditë në treg, qëndrojnë – bandat e vrasësve.
Midis urrejtjes dhe dashurisë, qëndron – blerja e nderit me paratë e vjedhura.
Midis hiçit dhe gjithçkasë, qëndron – Asgjëja që ka Çdogjë.
Midis Lindjes dhe Perëndimit, qëndrojnë – otomanët.
Prandaj, Reforma në Drejtësi duhet të shkatërrojë:
gjyqtarët e korruptuar,
partitë,
nënshtrimin për bukën e gojës,
koburen,
shitjen e diplomave,
bandat e vrasësve,
blerjen e nderit me paratë e vjedhura,
Asgjënë që ka Çdogjë,
frikën, dhe
otomanët.
