Distanca të barabarta nga Lula për Ukrainën – “Putin dhe Zelensky janë po aq fajtorë”
Ish-presidenti brazilian Lula da Silva ka thënë se Rusia nuk duhet të pushtojë kurrë Ukrainën, por se presidenti ukrainas Volodymyr Zelensky është “njëlloj përgjegjës për luftën” me homologun rus Vladimir Putin.
Në një intervistë për revistën amerikane Time, kreu i së majtës në Brazil thekson gjithashtu se beson se presidenti amerikan Joe Biden mund të kishte bërë më shumë për të parandaluar konfliktin në vend që ta nxiste atë.
Lula, i cili është paraqitur në kopertinën e Time këtë javë, konsiderohet favorit në zgjedhjet presidenciale të tetorit në Brazil dhe aspiron të parandalojë rizgjedhjen e Bolsonaro-s së ekstremit të djathtë për të vijuar në presidencë.
Ndër të tjera, Lula tha se ishte e papërgjegjshme nga ana e liderëve perëndimorë të mbështesnin Zelensky-n sepse ata inkurajuan luftën në vend që të fokusoheshin në negociatat me dyer të mbyllura që synonin t’i jepnin fund armiqësive.
“Shoh presidentin e Ukrainës duke folur në televizion dhe duke u duartrokitur eurodeputetët,” tha ai. “Ky njeri është po aq përgjegjës sa Putini për luftën. Sepse në luftë nuk ka vetëm një fajtor”.
Lula theksoi se Biden dhe udhëheqësit e BE-së nuk bënë mjaftueshëm për të negociuar me Rusinë përpara pushtimit të Ukrainës në shkurt. “Shtetet e Bashkuara kanë shumë ndikim politik dhe Biden mund ta kishte parandaluar luftën në vend që ta nxiste atë,” tha ai.
Shtetet e Bashkuara dhe Bashkimi Evropian mund të kishin parandaluar pushtimin rus duke e bërë të qartë se Ukraina nuk do të anëtarësohej në NATO, vazhdoi Lula. “Putini nuk duhet të kishte pushtuar Ukrainën. Por fajin nuk e ka vetëm Putini. Fajin e kanë edhe Shtetet e Bashkuara dhe Bashkimi Evropian”, tha ish-presidenti brazilian. /tesheshi.com/
