Në qershor 2022, Rakus, një orangutan mashkull sumatran, u plagos në fytyrë, poshtë syrit të djathtë, me sa duket në një përleshje me një mashkull tjetër në Qendrën Kërkimore Suak Balibing, një zonë e mbrojtur në pyllin tropikal indonezian. Ajo që bëri 30-vjeçari Rakus tre ditë më vonë i befasoi shkencëtarët: ata e panë atë duke u kujdesur për plagën duke përdorur një bimë lokale të njohur si qetësues dhimbjesh, por edhe për shërimin e plagëve falë vetive të saj antibakteriale, anti-inflamatore, antifungale dhe antioksiduese.
Është hera e parë që një sjellje e tillë vërehet te një majmun në mjedisin e tij natyror, raportoi ekipi shkencor në artikullin e tyre të botuar në revistën Scientific Reports.
Isabelle Laumer, një specialiste në Institutin Max Planck të Gjermanisë dhe autore kryesore e studimit, tha se Rakus jeton me 130 orangutanë të tjerë në një zonë në Parkun Kombëtar Gunung Leuser të Indonezisë.
Tre ditë pas lëndimit, kafsha filloi të përtypte gjethet e një bime, të cilën vendasit e quajnë Akar Kooning (emri shkencor Fibraurea tinctoria). Por në vend që t’i gëlltiste, ai e fërkoi plagën me gishta, derisa u mbulua plotësisht nga tuli i bimës.
Plaga nuk u infektua kurrë. Pesë ditë më vonë, ajo u mbyll. Në 15 ditë, mbeti vetëm një shenjë e zbehtë.
“Ilaçi” i përdorur nga Rakus nuk është diçka “mrekulli” pasi përdoret edhe në mjekësinë tradicionale të rajonit më të gjerë, nga Kina në Azinë Juglindore, kryesisht për të luftuar malarinë. Por është “rasti i parë i regjistruar i kujdesit të një plage nga një kafshë e egër, me një specie bimore që përmban substanca aktive biologjike”, theksojnë studiuesit.
Nëse konfirmohet nga vëzhgime të tjera, do t’i shtohet listës në rritje të “vetë-mjekimi” te kafshët, veçanërisht majmunët. Në vitet 1960, majmunologia e famshme Jane Goodall pa për herë të parë shimpanzetë duke ngrënë gjethe që më vonë u zbuluan se kishin veti antiparazitare.
Studiuesit besojnë se sjellja e Rakus nuk ishte e rastësishme, por e synueshme, pasi ishte diçka që ai e bëri vazhdimisht dhe me kujdes, duke aplikuar “ilaçin” në një pjesë të caktuar të trupit të tij. /tesheshi.com/
