Pandeli Majko, ish-kryeministri i Shqipërisë me shtetësi kosovare, i ka kushtuar dy gisht status situatës më të fundit në veriun e Kosovës, ku një tren i konsideruar “provokativ” nga Prishtina zyrtare, nisur nga Beogradi për në Mitrovicë dhe i ndaluar më pas, e ka tensionuar disi situatën. Sidomos pas deklarimit të pazakontë të presidentit Nikoliç për ushtrinë serbe që mund ta dërgojë drejt Kosovës.
Sipas Majkon, Serbia duhet t’i lërë trenat, kërcënimet, armët e t’i shtrohet dialogut.
“Serbia nëpërmjet deklarimeve të presidentit të saj ka deklaruar se ‘do të dërgojë ushtrinë’ në Kosovë.
Një deklarim i tillë ka kohë që nuk dëgjohet nga politika serbe. Kjo mënyrë sjellje pati pasojë gjakosjen e rajonit dhe dërgoi në Gjykatën e Hagës lidershipin e Beogradit.
Të thuash dhe të bësh, janë dy gjëra të ndryshme në politikë. Historia ja ka dhënë serbëve dhe shqiptarëve mësimet e saj.
Dialogu është opsion i zgjidhjeve europiane dhe ka raport me të vërtetën e paqes që duan kombet në rajon. Kjo e vërtetë fton gjakftohtësinë të kuptojë. Politikan nuk të bën lufta. E kundërta është e vërtetë.
Trim nuk të bëjnë deklaratat e luftes. Kjo është po aq e vërtetë sa fakti se një tren nuk bëhet kishë me piktura fetare.
Të kuptuarit e luftës është akt dhe jo deklaratë. Kjo do pak mencuri në të kuptuar, e cila kombit serb, si rregull, nuk i ka munguar.
Për më tepër, shqiptarët kanë një të metë kombëtare. Ata janë më të aftë në luftë se sa në paqe. Sigurisht”, shkruan Majko. /tesheshi.com/
