Ish-kryeministri Majko, një nga figurat qendrore të PS-së, njëherësh ministër për Diasporën, tha për herë të parë në pluralizëm, partia e tij synon mandatin e tretë në qeverisje. Sipas tij, kjo do ndodhte dhe me Nanon në 2005, nëse nuk do kishte qenë përçarja nga LSI. Sot, PS vlerësoi ai, është në unitet të plotë.
“Hera e parë që po diskutojmë për të marrë një mandat të tretë. Në 2005 pothuajse e kapëm, por e humbëm në raundin e dytë. Sot që flasim nuk vuajmë përçarjen, nuk kemi një histori të rëndësishme të brendshme, siç kishim me LSI atëherë”, tha Majko në “5 Pyetje nga Babaramo”.
Ai gjykoi se mandati i dytë nuk i realizoi pritshmëritë, se vërtet njerëzit janë të pakënaqur, porse kjo kishte arsye tejpolitike, tejqeverisëse.
“Do të donim të bënim më shumë, por viti i fundit na ka rraskapitur. Nuk besoj se ka pasur një qeveri tjetër që brenda një viti të jetë goditur nga tre tërmete dhe pastaj nga koronavirusi. Kjo është një histori që e ka goditur rëndë jo vetëm stabilitetin social, por edhe qeverinë. I vetëdijshëm që ka qytetarë që janë të pakënaqur”, tha Majko.
Megjithatë, ai tha se nuk ka të krahasuar pozicioni i sotëm i mazhorancës dhe i opozitës, me të djeshmen.
“Në momentin që është ndërruar një qeveri pas dy mandateve, opozita ka qenë gati. Kurse aktualisht, ta krahasoj opozitën e tanishme me atë të PS-së në 2013 dhe të PD-së në 2005, është ndryshe, për keq. Kjo është një arsye pse besojmë te fitorja, por jo themelorja”, arsyetoi Majko. /tesheshi.com/
