Ministri Majko ka folur për herë të parë për të “fortët” e PS-së në procese zgjedhore, duke pohuar njëherësh se vota është blerë, e madje ka përmendur dhe çmimet, nga 50 deri në 100 euro.
Por sipas tij, është një mesele e nisur jo nga PS.
“E kemi thënë dhe ka patur zona, mesatarja ka qenë 50 euro, por për shkak të përplasjes së egër ka vajtur edhe në 100 euro. Dhe e dinin të gjithë. Dikush thotë se ‘si ka mundësi që PS-së i vajtën disa të fortë?’, sepse ishin disa të fortë që vinin dhe rrëmbenin kutinë e votimit, na rrihnin komisionerët, nuk po flas për ’96-ën, por për më vonë. Si rezultat i forcës, si rezultat i vjedhjes, si rezultat i egërsisë, çdo aksion ka një kundër aksion. Nuk filloi historia e Shqipërisë në këto dy zgjedhjet e fundit. Zgjedhjet janë blerë në Shqipëri. Turpi më i madh është të ulërasë për vjedhje hajduti”, u shpreh Majko, i ftuar në Top Talk në TCH.
Nga ana tjetër, njeri që mban dhe shtetësi kosovare dhe e ka të vëllanë dhëndër Kosove, tha se nuk i pëlqejnë kompetentët në dy anët e kufirit, teksa flasin për atë që ndodh matanë kufirit.
“Nuk më pëlqen që nga Tirana të dalin kompetentë për çfarë ndodh në Prishtinë. Dhe nuk më pëlqen që nga Prishtina të dalin disa kompetentë që të flasin me kompetencë të plotë se çfarë ndodh në Tiranë. Mendoj se jemi ende herët që të flasim me kompentecë se çfarë po ndodh në Prishtinë. Kjo historia e ‘kompetentëve; duhet parë me shumë kujdes. Mendoj që kë më shumë mund të prish punë sesa të rregullojë punë”, theksoi anëtari i kabinetit Rama, të cilit i është besuar diaspora. /tesheshi.com/
