Në një intervistë për KosovaPress, ministri i Diasporës Pandeli Majko, ka shpjeguar se pse Serbia vijon të jetë aq e pranishme me produktet e saj në tregun kosovar. Duke i mëshuar faktit se ende dy anët e kufirit kanë barriera mes tyre, Majko, i cili është dhe kosovar me shtetësi, tha se duhet të vijë një kohë që ky realitet, aspak pozitiv për ekonomitë e të dy hapësirave, të ndryshojë.
“Ende ekonomia e Kosovës është më e orientuar nga vendet të tjera të tranzicionit, sepse vetë blerësi shqiptar, qoftë në Shqipëri, qoftë në Kosovë, është një blerës tradicional që nuk e ndërron kollaj blerjen e një malli me një mall tjetër. Kështu unë nuk çuditem që akoma tregu i Serbisë ka influencë të madhe në Kosovë apo akoma tregu i Italisë dhe Greqisë, tani ka filluar dhe ai i Kinës, ka më shumë influencë tek ne. Në një kohë që ne me një politikë të kujdesshme, më lëvizjen e lirë të njerëzve dhe mallrave, ne mund të prodhojmë gjëra që do të çuditemi më vonë se si i kemi bërë”, tha Majko.
Sipas tij, mjaft të shohësh se ë’ndodh në kufirin Shqipëri – Kosovë, për të kuptuar se sa e mbrapshtë është situata.
“Po të kalosh në kufirin midis Shqipërisë dhe Kosovës, të duket sikur po kalon në kufirin me një shtet tjetër, Greqinë apo Maqedoninë. Shikon karvanë që presin radhën për të kaluar doganat tona. Dhe, nuk them që ligjet e vendeve dhe shteteve tona nuk duhen respektuar, por mendoj se vendimi i të dy qeverive për të hapur kufijtë për lëvizjen e lirë të mallrave dhe njerëzve do të jetë një ndihmues i jashtëzakonshëm sepse penetrimi i investimeve të Kosovës në Shqipëri dhe pastaj të investimeve të Shqipërisë në Kosovë është ende shumë ulët në nivelin e pritshëm”, thekson ministri i Diasporës në qeverinë “Rama”.
Majko fajëson mediokritetin në administrat e dy hapësirave, që ende nuk kanë mundur të ndryshojnë realitetet ekonomike.
“Po të ishte klima kaq e favorshme, nuk do të diskutonim krijimin e dhomës së biznesit të diasporës në Shqipëri dhe të odës së biznesit të diasporës në Kosovë. Kemi administrata të cilat në një pjesë të madhe ende janë mediokre dhe që kur dikush ju flet shqip e respektojnë më pak se sa kur dikush ju flet anglisht, gjermanisht apo frëngjisht dhe kjo duhet thënë kështu siç është. Kështu që, nga ky këndvështrim mendoj që ne duhet të kuptojmë të folurën shqip në ekonomi dhe këtë jam i bindur që do të krijojmë nëpërmjet krijimit të mekanizmave se sa të dashurisë së politikës për diasporën”, theksoi Majko në intervistë. /tesheshi.com/
