Bavarezët treguan sot se nuk e kanë marrë veten nga ai eliminim prej Realit të Madridit në Champions League.
Në javën e 30-të të Bundesligës, Bajerni i Mynihut ka barazuar 2-2 me Mainzin në “Allianz Arena”. Ky ishte barazimi i dytë rresht në kampionat, pas atij pa gola ndaj Leverkusenit një javë më parë në transfertë.
Pa Neuer-in e dëmtuar në portë, Ancelotti kishte lënë në stol dhe kapitenin Lahm e Xabi Alonso-n. Mainzi, që kërkon t’u ikë vendeve të fundit të renditjes, kaloi dy herë në epërsi, më së pari në minutën e 3-të. Për të shënuan Bojan Krkic dhe Brosinski, ndërsa për bavarezët barazuan dy herë Robben dhe Thiago Alcantara.
Bajerni shkoi në kuotën e 70 pikëve, në kryesim të Bundesligës, por largësia me Lajpcigun mund të zbresë në gjashtë pikë nëse ky i fundit fiton të dielën në fushën e Shalkes.
Mërgim Mavraj luajti gjatë gjithë takimit në humbjen e Hamburgut 1-2 në shtëpi ndaj Darmstadtit, skuadrës së vendit të fundit në klasifikim. Futbollisti i kombëtares së Shqipërisë mori dhe një karton të verdhë nga fundi i lojës.
Kjo humbje e rizbret Hamburgun në vendet e fundit, duke rikthyer frikën për një rënie të mundshme një kategori më poshtë. Në vend të 15-të, Hamburgu ka 33 pikë, një më shumë se Augsburgu, që i përket treshes së fundit.
Në takimet e tjera të kësaj pasditeje në Bundesligë, Herta e Berlinit fitoi 1-0 ndaj Volfsburgut, Ingolstadti u mund në shtëpi 2-4 nga Verder Bremeni, dhe Eintrahti i Frankfurtit mposhti 3-1 Augsburgun. /tesheshi.com/
