Qeveria spanjolle i ka kërkuar udhëheqësit katalonas, Carles Puigdemont që brenda pesë ditëve të deklarojë nëse Katalonia e ka shpallur pavarësinë, njofton agjencia spanjolle e lajmeve Efe.
Po ashtu Qeveria spanjolle ka njoftuar se, nëse Puigdemont konfirmon se e ka shpallur pavarësinë, ai do të ketë tre ditë kohë për të korrigjuar vendimin.
Një ditë më parë, Puigdemont para parlamentit të Katalonjës la të hapur mundësinë e shpalljes së pavarësisë, ndërsa u shpreh në mbështetje të nisjes së dialogut me Spanjën. Ky qëndrim evaziv i presidentit të rajonit nuk u mirëprit nga mbështetësit e shpalljes së pavarësisë, por as nga opozita e majtë në parlamentin e Katalonjës. /tesheshi.com/
