Partia e Rilindjes e presidentit francez Emmanuel Macron ka propozuar ndalimin e veshjes së hixhabit për vajzat nën moshën 15 vjeç, pasi ai urdhëroi ministrat të përgatisin një përgjigje ndaj një raporti që akuzon grupin e Vëllazërisë Myslimane për drejtimin e një fushate të fshehtë për të islamizuar vendin.
Ish-kryeministri francez dhe kreu i partisë së Rilindjes, Gabriel Attal, propozoi një ndalim për “të miturat nën moshën 15 vjeç që mbajnë vello në hapësirat publike”, duke shtuar se hixhabi “minon seriozisht barazinë gjinore dhe mbrojtjen e fëmijëve”.
Attal i tha gazetës Le Parisien se ai gjithashtu dëshiron të vendosë ndëshkime për prindërit që i detyrojnë vajzat nën 18 vjeç të mbajnë shami.
Propozimet e Attal-it u kritikuan nga disa ligjvënës të krahut të majtë, me zyrtarin e Partisë Socialiste Jerome Guedj që e akuzoi se “po ndjek të djathtën ekstreme” dhe “po e kthen sekularizmin francez kundër myslimanëve”.
Sipas ligjit aktual francez, nëpunësit civilë në ndërtesat qeveritare, duke përfshirë shkollat dhe spitalet, nuk mund të mbajnë simbole fetare si kryqi i krishterë, kipa hebraike, çallma sikhe apo shamia myslimane, sipas Guardian.
Në vitin 2004, Franca ua ndaloi vajzave mbajtjen e shamisë në shkollat publike, së bashku me një ndalim për të gjitha simbolet e tjera fetare si kryqet ose çallmat, dhe qeveria franceze aktualisht po debaton propozimin e një ligji të ri që do të ndalonte shamitë në garat sportive vendase.
Raport mbi “islamizimin e Francës”
Kabineti i Macron-it ka njoftuar se një raport mbi islamizimin në Francë do të publikohet deri në fund të kësaj jave, por nuk dihet nëse hixhabi do të jetë pjesë e atij raporti. Më herët, Macron u tha ministrave të përgatisin një përgjigje ndaj një raporti që akuzon Vëllazërinë Myslimane se po zhvillon një fushatë të fshehtë përmes ndërmjetësve vendas për të depërtuar në vlerat dhe institucionet laike të Francës.
Raporti, i porositur nga qeveria, bëri thirrje për veprime për të ndaluar “përhapjen e ngadaltë të Islamit politik që përbën një kërcënim për kohezionin shoqëror“, duke tërhequr kritika nga anëtarët e komunitetit mysliman dhe disa akademikë.
Raporti e përshkruan shoqatën Muslimane të Francës si “degën kombëtare” të Vëllazërisë Myslimane, një organizatë globale që u themelua në Egjipt në vitin 1928 si “pjesë e lëvizjes për t’i dhënë fund sundimit kolonial”. /tesheshi.com/
