Presidenti francez Emmanuel Macron foli me liderin ukrainas Volodymyr Zelensky dhe presidentin amerikan Donald Trump pas përplasjes së tyre në Shtëpinë e Bardhë, njoftoi zyra e tij të shtunën, më 1 mars.
Në intervistat për mediat franceze, Macron bëri thirrje për “qetësi” mes dy liderëve, por edhe për dialog për një “mburojë” të mundshme bërthamore evropiane, sepse kontinenti nuk mund të llogarisë më në Shtetet e Bashkuara të Amerikës.
Në intervista, ai tha se ne të gjithë duhet “të rivendosim paqen, respektin… që të mund të ecim përpara… sepse ajo që është në lojë është shumë e rëndësishme”.
Përplasja e së premtes, gjatë së cilës Zelensky u dëbua nga Shtëpia e Bardhë, ka ngritur frikën në Evropë për angazhimin e Amerikës në luftën e Ukrainës kundër pushtimit rus.
Macron tha se çdo “tërheqje” e SHBA nga Ukraina “nuk është në interesin e saj”, sepse detyrimi i Kievit për të “nënshkruar një armëpushim pa garanci sigurie” do të nënkuptonte se “aftësia e tij për të frenuar Rusinë, Kinën dhe të tjerët do të zhdukej në të njëjtën ditë”.
Kur u pyet nëse do të fliste me presidentin rus Vladimir Putin, siç bëri në fillim të luftës, Macron u përgjigj se “nuk e përjashton këtë“, por se do ta bënte këtë “në momentin e duhur”.
Presidenti francez paralajmëroi se nëse Putini nuk ndalet në Ukrainë, “ai do t’i drejtohet Moldavisë dhe ndoshta Rumanisë”.
“Ne kemi një mburojë, ata jo. Dhe ne nuk mund të varemi më nga parandalimi bërthamor amerikan. Ne kemi nevojë për një dialog strategjik me ata që nuk e kanë atë, dhe kjo do ta bënte Francën më të fortë,” tha Macron për gazetën Le Parisien. /tesheshi.com/
