Presidenti i ri i Francës ka patur për mik në Elize kryeministrin e Italisë, në mbyllje të së parës javë në krye të detyrës.
Temë kryesore e diskutimit mes Emmanuel Macron-it dhe Paolo Gentiloni-t ka qenë çështja europiane, me shefin e qeverisë italiane që ka deklaruar se presidenti i ri francez i jep shpresë dhe besim Europës.
Dy personalitetet kanë premtuar se do të punojnë së bashku për ringjalljen e Europës, e në të njëjtën kohë, Macron ka theksuar vendosmërinë për të punuar për një përtëritje të vërtetë të perspektivave europiane.
Mikpritësi ka bërë thirrje për integrim më të madh të Bashkimit Europian për t’i dhënë zgjidhje krizës së migracionit, duke kritikuar shpërfilljen e anëtarëve të unionit për paralajmërimet e Italisë mbi barrën në rritje.
Gentiloni sugjeroi nga ana e tij përpilimin e një politike të përbashkët të BE-së për migracionin. Në këndvështrimin e tij, një prej përparësive të vendeve të BE-së ishte puna për një union fiskal dhe bankar.
Macron do të vizitonte në fillim të javës së shkuar Berlinin, ku do të takohej me kancelaren Merkel, për t’u takuar dy ditë më pas në Paris me presidentin e Këshillit Europian, Donald Tusk. /tesheshi.com/
