Macron “nxehet” me Izraelin

Në një intervistë për BBC, presidenti francez Emmanuel Macron i bëri thirrje Izraelit të ndalojë bombardimet që po vrasin civilë në Gaza.

“Ne vuajmë së bashku me Izraelin dhe e kuptojmë dëshirën e tyre për t’u çliruar nga terrorizmi. Megjithatë, sot civilët në të vërtetë po bombardohen. Fëmijë të vegjël, gra dhe të moshuar po vdesin nën bomba. Nuk ka asnjë justifikim dhe asnjë legjitimitet për këtë. Ne prandaj bëjini thirrje Izraelit të ndalojë”, theksoi Macron.

“Reagimi në luftën kundër terrorizmit duhet të jetë në përputhje me rregullat ndërkombëtare të luftës dhe të drejtën ndërkombëtare humanitare sepse është një vend demokratik”, tha presidenti francez.

Duke iu përgjigjur një pyetjeje në lidhje me shkeljen e mundshme të ligjit ndërkombëtar nga Izraeli, Macron theksoi se ai “nuk është gjykatës”, por “president i shtetit”.

Ai tha gjithashtu se ishte i shqetësuar se “bombardimi i plotë” i Gazës mund të nxiste një “dëshirë për hakmarrje” në rajon.

Biseda u zhvillua një ditë pas “konferencës humanitare” të organizuar të enjten në Paris me sugjerim të presidentit francez, ku ai bëri thirrje “të punohet për një armëpushim”.

“Nuk ka zgjidhje tjetër përveç një pauze humanitare në fillim, dhe më pas një armëpushim që do të lejojë mbrojtjen e të gjithë civilëve që nuk kanë të bëjnë fare me terroristët,” vuri në dukje ai të premten.

“Nuk mund të themi se po luftojmë terrorizmin duke vrarë të pafajshëm”, shtoi presidenti francez. /tesheshi.com/