Macron, një ofertë për dy “grindavecë” në Ballkan

Presidenti francez Emmanuel Macron ka shprehur gatishmërinë për të pritur përfaqësuesit e autoriteteve bullgare dhe maqedonase veriore “kur të vijë koha” për të përfunduar një marrëveshje dypalëshe që do të lejonte hapjen e negociatave për anëtarësimin e Shkupit në Bashkimin Evropian.

Franca, e cila mban presidencën e rradhës deri më 1 korrik, prej javësh kërkon një zgjidhje për mosmarrëveshjen midis dy vendeve, tha Pallati Elysee pas bisedave telefonike të Macron me presidentin bullgar Rumen Radev dhe kryeministrin e Maqedonisë së Veriut Dimitar Kovachevski.

Gjatë këtyre bisedimeve, Macron shprehu “mbështetje të plotë për marrëveshjen midis dy vendeve, e cila do të kontribuonte në marrëdhëniet e mira fqinjësore dhe do të forconte perspektivën evropiane të Maqedonisë së Veriut”, tha Presidenca franceze.

Bullgaria bllokoi pranimin e Maqedonisë së Veriut në BE në nëntor 2020 për shkak të mosmarrëveshjeve gjuhësore dhe historisë.

Përpara bllokadës bullgare, Maqedonia e Veriut u përball me vite me veton nga Greqia, e cila ia mohoi emrin Maqedoni, sepse e quan kështu edhe krahinën e saj në veri, duke e parë atë si një uzurpim të trashëgimisë së saj historike.

Veto për negociatat e 2019

Athina e hoqi veton vetëm në vitin 2018, kur emrit të Maqedonisë iu shtua emri “e Veriut”.

Nga fundi i shkurtit deri në fillim të marsit të këtij viti, Ukraina, Gjeorgjia dhe Moldavia aplikuan me radhë për anëtarësim në BE, pas fillimit të pushtimit rus të Ukrainës.

Duke parashikuar një proces të gjatë integrimi të vendeve kandidate, Macron më 9 maj propozoi përshpejtimin e pranimit të Ukrainës në BE përmes krijimit të një komuniteti politik evropian.

Pesë vende janë aktualisht zyrtarisht kandidatë për anëtarësim në BE – Maqedonia e Veriut, Mali i Zi, Serbia, Shqipëria dhe Turqia.

Në vitin 2019, Macron, së bashku me dy vende të tjera anëtare, vuri veton ndaj hapjes së negociatave të anëtarësimit me Maqedoninë e Veriut dhe Shqipërinë, duke besuar se kushtet për zgjerimin e BE-së me këto dy vende nuk ishin përmbushur. /tesheshi.com/