Macron: Një imperializëm të ri në Paqësor!

Presidenti francez Emmanuel Macron paralajmëroi për një “imperializëm të ri” në Paqësor gjatë një vizite në rajon, duke dënuar “sjelljen grabitqare të fuqive të mëdha” ku Kina po zgjeron lidhjet tregtare dhe të sigurisë.

Franca, e cila ka territore ishullore që shtrihen në Indo-Paqësorin, duke përfshirë Polinezinë Franceze, ka rritur lidhjet e mbrojtjes me Indinë dhe vendet e tjera në rajon si pjesë e lëvizjeve për të kundërshtuar ndikimin e Kinës, raportoi Reuters.

Në një fjalim në Vanuatu, Macron, presidenti i parë francez që shkeli në kombin ishullor të Paqësorit që nga Charles de Gaulle, tha se Franca do të punojë “krah për krah” me vendet në rajon për të ruajtur pavarësinë e tyre.

“Në Indo-Paqësorin, veçanërisht në Oqeani, ekziston një imperializëm dhe një logjikë pushteti që kërcënon sovranitetin e shumë shteteve, më të voglat dhe shpeshherë më të brishtët”, tha Macron, pa përmendur asnjë vend.

Bota moderne po trondit sovranitetin dhe pavarësinë e Indo-Paqësorit, tha ai.

Rrezik nga Kina

Pas vizitës së tij në Vanuatu, Macron është planifikuar të mbërrijë sonte në Papua Guinenë e Re, të cilën sot e vizitoi sekretari amerikan i Mbrojtjes, Lloyd Austin.

Në maj, SHBA dhe Papua Guinea e Re nënshkruan një marrëveshje mbrojtëse, e cila vendos kornizën për Uashingtonin për të rindërtuar portet dhe aeroportet e vendit për përdorim ushtarak dhe civil.

SHBA dhe aleatët e saj po përpiqen të bindin vendet ishullore të Paqësorit nga vendosja e lidhjeve të sigurisë me Kinën, sipas Reuters.

Këshilltarët e Macron thonë se Franca mund të jetë një “alternativë” dhe të ndihmojë shtetet ishullore të diversifikojnë partneritetet e tyre në mënyrë që të mos bëhen shumë të varur nga një vend. /tesheshi.com/