Presidenti francez Emmanuel Macron nuk ka njoftuar zyrtarisht se do të kandidojë në zgjedhjet presidenciale në prill, por ai ende po bën plane afatgjata për vendin dhe ekipi i tij i fushatës po takohet aktivisht me votuesit.
Për këtë arsye kritikohet se ka përdorur në mënyrë të padrejtë postin presidencial për fushatën e mandatit të dytë, ndërsa ka vonuar shpalljen e kandidaturës, edhe pse kanë mbetur më pak se dy muaj deri në raundin e parë të zgjedhjeve më 10 prill.
Macron tha muajin e kaluar se donte të kandidonte, por se do të priste që situata e pandemisë të përmirësohej përpara se të merrte një vendim. Afati i fundit për deklarimin zyrtar të kandidaturës është data 4 mars.
Ai tha gjithashtu se donte të fokusohej fillimisht në krizën ruso-ukrainase, për shkak të së cilës ai vizitoi Moskën dhe Kievin javën e kaluar.
Megjithatë, kritikët thonë se udhëtimet e tij të fundit në zonat franceze i ngjajnë gjithnjë e më shumë një fushate presidenciale pasi ai njoftoi një investim 100 milion euro gjatë një vizite në veri për të nxitur ekonominë në zonë.
Udhëheqësi i Partisë Republikane, Cristian Jacob dënoi “keqpërdorimin e parave publike” dhe tha se e kishte raportuar çështjen në Komisionin Kombëtar të Zgjedhjeve.
Franca ka rregulla strikte për financimin e fushatës presidenciale. Ish-presidenti Nicolas Sarkozy u dënua me një vit burg vitin e kaluar për financim të paligjshëm të fushatës. /tesheshi.com/
