Presidenti francez Emmanuel Macron ofroi të enjten një rol ndërmjetësimi midis qeverisë së Irakut dhe Qeverisë Rajonale të Kurdistanit (KRG) e cila po kërkon pavarësinë pas një referendumi të diskutueshëm.
Macron bëri këtë ofertë pas takimit me kryeministrin e Irakut Haider al-Abadi në Paris, ku ndër tjerash u bisedua edhe rreth mbështetjes franceze për luftën kundër Daesh dhe rindërtimin e ekonomisë së Irakut. Macron tha se Franca dhe të tjerët janë të shqetësuar për situatën rreth KRG-së pas referendumit të muajit të kaluar dhe tha se Franca mbështet stabilitetin dhe integritetin territorial të Irakut.
Ai këmbënguli në rëndësinë e “pajtimit kombëtar dhe qeverisjes gjithëpërfshirëse” që përfshin KRG-në “me të cilin Franca mban lidhje të ngushta”. Macron tha se dialogu “është rruga e vetme” dhe se “Franca është e gatshme të kontribuojë në mënyrë aktive rreth ndërmjetësimit”.
Më 25 shtator, irakenët votuan për shpalljen e pavarësisë nga Iraku në zonat e mbajtura nga KRG dhe në disa zona të kontestuara midis Bagdadit dhe Irbilit, përfshirë Kirkukun. Administrata e KRG-së mobilizoi forcat shtesë peshmerga në Kirkuk disa orë para se të fillonte votimi për të siguruar referendumin, i cili është quajtur i paligjshëm. Sipas rezultateve të shpallura nga KRG, pothuajse 93 për qind e votuesve të regjistruar hodhën votën në favor të pavarësisë.
Referendumi u përball me kundërshtim të ashpër nga shumica e aktorëve rajonalë dhe ndërkombëtarë, shumë prej të cilëve paralajmëruan se referendumi vetëm sa do të shmangë vëmendjen nga lufta e vazhdueshme e Irakut kundër terrorizmit dhe do të destabilizojë më tej rajonin tashmë të paqëndrueshëm. /tesheshi.com/
