Presidenti francez Emmanuel Macron tha se Evropa duhet “të përgatitet për luftë nëse dëshiron paqen”, duke shtuar se presidenti rus Vladimir Putin “është një kundërshtar që nuk do të ndalet në Ukrainë nëse fiton”.
“Nëse Rusia e fiton këtë luftë, besueshmëria e Evropës do të zvogëlohet në zero”, tha Macron në një intervistë për stacionet televizive franceze TF1 dhe France 2, raporton Reuters.
Ai theksoi se Evropa “nuk duhet të tërheqë vija të kuqe që do të inkurajonin Rusinë të vazhdojë pushtimin e saj në Ukrainë”.
I pyetur për dërgimin e mundshëm të trupave perëndimore në Ukrainë, presidenti francez përsëriti se ky opsion nuk duhet të përjashtohet. Por ai theksoi se situata aktuale nuk kërkon një hap të tillë.
“Ne nuk jemi në këtë situatë sot, por të gjitha opsionet janë të mundshme”, tha ai.
Macron vuri në dukje se Franca nuk do të nisë kurrë një ofensivë kundër Rusisë dhe se Parisi nuk është në luftë me Moskën, pavarësisht faktit se “Rusia ka nisur sulme agresive ndaj interesave franceze në Francë dhe jashtë saj”.
Ai shtoi se Ukraina është në një situatë “të vështirë” në terren, kjo është arsyeja pse ajo ka nevojë për mbështetje më të fortë nga aleatët e saj.
Macron shpreson se një ditë do të jetë koha për të negociuar paqen me presidentin rus “kushdo qoftë ai”.
Presidenti francez tha muajin e kaluar se vendet që mbështesin Ukrainën nuk duhet të përjashtojnë mundësinë e dërgimit të trupave të tyre në front.
Deklarata e tij shkaktoi një sërë përgjigjesh nga aleatët të cilët kishin njoftuar më parë se nuk kishin ndërmend të dërgonin trupa në Ukrainë. /tesheshi.com/
