Dy kandidatët në balotazhin e zgjedhjeve presidenciale franceze janë përballur mbrëmjen e shkuar në një debat televiziv ku kanë mbizotëruar tonet e ashpra.
Më 7 maj do të votohet për Emmanuel Macron-in apo për Marine Le Pen-in, për pikëpamjet centriste të të parit ose për ato ekstremiste të së djathtës të së dytës.
Një anketim pas këtij debati ka treguar se Macron ka dalë fitues në të, ashtu siç pritet të ndodhë dhe të dielën.
Ish-ministri i Ekonomisë është akuzuar nga rivalja si kandidat i globalizimit të egër, i brutalitetit shoqëror, i luftës së të gjithëve kundër të gjithëve.
“Ju jeni trashëgimtare e një emri, e një partie politike, e një sistemi që ka bërë përpara për vite me radhë në kurriz të zemërimit të popullit francez,” ka qenë përshkrimi që i ka bërë Macron ekstremistes në krahun tjetër të tavolinës së debatit.
Zgjidhja e përqindjes së lartë të papunësisë në vend, përmirësimi i shërbimeve publike, siguria, euroja, pozita e Francës ndërkombëtarisht, kanë qenë pjesë e debatit.
Macron do ta akuzonte Le Pen-in për mosdhënie zgjidhjesh për problemet e Francës, siç është ai i papunësisë, ndërsa Le Pen do të përgjigjej duke e çmuar atë si vazhdim të qeverisë socialiste.
“Gënjeshtare” është fjala e përdorur nga Macron në këtë debat për kundërshtaren.
“Strategjia juaj është thjesht të thoni një tufë gënjeshtrash, thjesht të thoni se çfarë nuk po shkon si duhet në vend.”
Në fushën e sigurisë, debati ka ofruar po ashtu përplasje.
Le Pen ka fshikulluar qëndrimin, sipas saj, të butë të Macron-it: “Ju nuk keni plan [për sigurinë], por jeni i butë me fundamentalizmin islamik.”
Kandidati centrist e ka cilësuar si përparësi terrorizmin nëse zgjidhet, duke qëndruar gjithnjë në të njëjtën fushë që jep goxha pikë në fushatë: “Unë kam për të udhëhequr luftën kundër terrorizmit islamist në çdo nivel.”
Kur debati kaloi te Europa, Le Pen deklaroi me ironi se, “Franca do të udhëhiqet nga një grua, ose nga unë ose nga Merkel.”
Ajo tha se Macron-i do ta linte Francën të shtypej nga Gjermania e fuqishme ekonomikisht.
Në pozita të kundërta në lidhje me BE-në dhe euron, për Le Pen-in, “euroja është monedhë e bankierëve, jo monedhë e popullit”, e për Macron-in, euroja ka tepër rëndësi dhe “nuk është thjesht një politikë”.
Emmanuel Macron është njeriu që pritet t’i fitojë zgjedhjet të dielën, siç i fitoi në raundin e parë. Debati televiziv konfirmoi epërsinë e tij ndaj ekstremistes Le Pen. /tesheshi.com/
