Nga Mensur Krasniqi
Kreu i VMRO-së, dhe njëherësh ish-kryeministri i Maqedonisë, Nikolla Gruevski ka shtrirë dorën e bashkëpunimit me LSDM-në e Zoran Zaevit vetëm për të mos lejuar realizimin e Platformës së partive shqiptare. Gruevski i bën porosi Zaevit që nëse duhet dikush të pësojë që ai të bëhet kryeministër, le të jetë ai, por jo edhe themelet e shtetit.
Madje Gruevski do të pranonte të shkon edhe në burg nëse Zaev tërhiqet nga koalicionimi me partitë shqiptare.
“Unë vullnetarisht do të pranoj që të më arrestojnë, malltretojnë, të më mbyllin, kurse VMRO-DPMNE do të përkrah qeverinë e pakicës, sa ai të dëshiroj deri në zgjedhjet e ardhshme, vetëm ai të tërhiqet nga sulmi i themelit të këtij shtetit për shkak të dëshirës që të jetë në pushtet. Këtë le ta sheh si ofertë publike”, ka shkruar në rrjetin social facebook, Nikolla Gruevski.
Përveç tjerash, Gruevski ka akuzuar rëndë se skenarist i gjithë kësaj situate është një ambasador, emrin e të cilit fare nuk e përmendi.
Sipas Gruevskit, ambasadori në fjalë tashmë ka një prokurori, duke aluduar në Prokurorinë Speciale, kurse pas formimit të qeverisë do të formojë edhe Gjykatë Speciale, që do të jetë e tij, por rikujton se ai është ambasador dhe se ka mandat të afatizuar.
Qëllimi primar i operacionit për të rrënuar qeverinë dhe sjelljen e Zoran Zaevit sipas Gruevskit është që të dobësohet shteti dhe të ndryshohet emri dhe identiteti i maqedonasve. Gruevski shkruan se dygjuhësia është qëllimi sekondar, kurse pas dygjuhësisë, do të fillojë përgatitja për kantonizim.
Gruevski thotë se ky proces po zhvillohet në 4 faza:
1. Krijimi i krizës dhe destabilizim.
2. Komprometim i pushteti me luftë speciale psikologjike dhe komprometim i institucioneve.
3. Zgjedhje dhe ndryshim i pushtetit, eliminim i tij.
4. Realizim i qëllimeve.
“Në fushatën zgjedhore të LSDM-së ishin të organizuar ekspert të huaj për operacione psikologjike me qëllim që të preken votuesit pasiv, dhe të motivohen që të dalin të votojnë”, vazhdon Gruevski.
Sipas kreut të VMRO DPMNE-së, nëse populli qëndron indiferent, ata do ta marrin shtetin dhe do ta ridefinojnë.
Pas ofertës së Gruevskit për bashkëpunim me Zaevin, nga partia e LSDM-së kanë thënë se askush më nuk i beson Gruevskit.
“Shumica e qytetarëve, më shume se 612.000 guximshëm zgjedhën ndryshimet për jetë dhe ardhmëri më të mirë. Shumica e qytetarëve votuan për ti dhënë fund qeverisjes kriminale të Nikolla Gruevskit dhe familjes së tij. Maqedonia së shpejti do të ketë Qeveri të re. Ndryshimet janë duke ndodhur, Maqedonia unitare dhe qytetare shkon përpara dhe atë askush nuk do ta ndalojë”, thuhet mes tjerash në reagimin e LSDM-së.
Në reagim po ashtu thuhet se Gruevski dhe bashkëpunëtorët e afërt të tij do të përgjigjen para institucioneve të sistemit për hajni, krim, korrupsion, tragjedive profesionale dhe familjare të cilat ua shkaktoi qytetarëve të Republikës së Maqedonisë.
Megjithatë si duket nga VMRO janë të vendosur në bashkëpunimin e tyre me LSDM-në, meqë edhe përkundër reagimit të LSDM-së, duke e quajtur gënjeshtarë Gruevskin, ata sërish kujtojnë LSDM-në me një reagim tjetër që nëse është për një Maqedoni të bashkuar të pranojë bashkëpunimin, dhe nëse është për një Maqedoni të krijuar sipas platformës nga Tirana mos të bashkëpunojnë me ta.
Është koha që LSDM-ja të tregojë nëse është për një Maqedoni të bashkuar dhe të vetme ose është për një Maqedoni të krijuar sipas platformës nga Tirana. Është koha që LSDM-ja të tregojë në vepër nëse dashuria ndaj atdheut është më e madhe se dëshira për pushtet me çdo kusht, thekson VMRO-DPMNE-ja në reagimin e kumtesës së LSDM-së me rastin e deklaratave të liderit të VMRO-DPMNE-së Nikolla Gruevski.
“Nëse LSDM-ja vendos të heqë dorë nga platforma nga Tirana dhe i hedh poshtë shantazhet joparimore për ridefinimin e shtetit, atëherë do ta ketë mbështetjen e VMRO-DPMNE-së edhe krahas asaj që qytetarët, mbështetjen më të madhe në zgjedhje ia dhanë programit të VMRO-DPMNE-së dhe Koalicionit për një Maqedoni më të mirë”, thuhet në reagim.
Sipas VMRO-DPMNE-së, qytetarët nuk votuan për zyrtarizimin e gjuhës shqipe, për ndryshimin e banknotave për shndërrimin e Maqedonisë në shtet binacional, për kantonizimin ose federalizimin e saj. /tesheshi.com/
