Eurodeputetja në largim, Ulrike Lunaçek, e cila përfundon misionin e saj si një raportuese e posaçme për Kosovën në Parlamentin Europinan në konferencën e saj përmbyllëse pas takimit me liderët kosovarë ka bërë të qartë se Kuvendi i Kosovës duhet sa më parë të ratifikojë marrëveshjen me Malin e Zi, në të kundërtën ka paralajmëruar se vonimi i ratifikimit të kësaj marrëveshje mund të ketë pasoja të rënda për Kosovën, siç ka thënë deri në mbylljen e dyerve për në Bashkimin Evropian.
“Tash topin e ka Kuvendi i Kosovës… Ju bëj thirrje shumicës ratifikuese që vërtetë të marrin 2/3 e votave për këtë sepse është koha, ora po ecën… Dera po mbyllet dhe kjo siç thash po ikën . Pra mund t’iu them që nëse nuk ndodh ratifikimi atëherë liberalizimi i vizave nuk do të bëhet. Nëse ndodh atëherë ka mundësi të madhe. Nuk mund të them 100 përqind po do të thoja 98 deri në 99 përqind që do të bëhet. Pra e vetmja mënyrë për të arritur liberalizimin e vizave është të ratifikohet marrëveshja. Kjo është me rëndësi që ka të bëj të përmirësohet dënimi, ndëshkimi i personave që janë të përfshirë në korrupsion dhe krim të organizuar. Po kjo është përmirësuar pak po kryesorja është ratifikimi”, tha ajo.
“Thaçi gënjeu, Haradinaj po mundohet të gjejë rrugëdalje”
Lunaçek më tej ka shtuar se BE nuk njeh marrëveshje të re për Demarkacionin dhe se Thaçi nuk ka drejtë të quaj bashkësinë ndërkombëtare mashtruese ngase vet e ka nënshkruar marrëveshjen dhe është dashur qysh atëherë të sigurojnë shumicën në Parlament.
“Kur kam biseduar me presidentin tuaj dje, unë kam qenë shumë e sinqertë e hapur me të gjithë këtu. Së fundi ai ka ngritur zërin në mediat e Kosovës, e po ashtu dhe në mediat në mbarë BE, duke fajësuar Komisionin Evropian që ka vënë një kusht ndaj qytetarëve me marrëveshjen e demarkimit. I thash shumë qartë ‘se kjo nuk është e vërtetë’. Ai ishte ministër i Jashtëm kur ka nënshkruar marrëveshjen. Ishte përgjegjësi e tij si ministër i kësaj Qeverie, që të sigurohet para se ta nënshkruajë atë të bisedoj me Kuvendin. Dhe të shoh nëse do ta siguroj shumicën apo jo. Dhe i kam thënë atij se ‘nëse tash e fajëson Komisionin, fajësimi i BE nuk është mënyra për të ecur përpara’. Është e kundërta, e kthen Kosovën pas. Sepse Komisioni Evropian dhe shtetet anëtare të BE do të thonë se ‘ata e kanë nënshkruar atë, pse s’po e marrin përgjegjësinë për këtë. Ata e kanë nënshkruar dhe e kanë ditur prej vi tit 2012’. Ta fajësosh tash BE-në është në kundërshtim të plotë, me atë që do të bëjë një president për vendin dhe qytetarët e tij. Isha e qartë dhe i thash se do ta them dhe publikisht kur të më pyesin. Z, Haradinaj tani po përpiqet të gjejë rrugëdalje prej kësaj. Për neve është e qartë që është një marrëveshje dhe duhet të ratifikohet, është për të ardhmen e qytetarëve”, tha Lunaçek.
Ajo tha se gjatë 8 viteve sa ishte raportuese në Kosovë, ka pasur përparim në disa gjëra, përderisa shëndetësia, arsimi dhe punësimi janë pikat që fushat që ende ka nevojë të punohet në to. Sipas saj, duhet të punohet drejt marrëdhënieve të Kosovës dhe BE-së dhe Kosovës dhe Serbisë. /tesheshi.com/
