Premtimet e shumta që po bëjnë partitë kosovare gjatë fushatës zgjedhore siç duket e kanë nervozuar jo pak edhe raportuesen për Kosovën në Parlamentin Evropian, Ulrike Lunaçek, e cila ka kërkuar nga politikanët të mos bëjnë premtime që nuk mund t’i realizojnë.
“Unë mendoj se është shumë me rëndësi që të mos jepen premtime të cilat nuk mund të realizohen. Kosovarët nuk e meritojnë që t’u premtohet mjaltë e sheqer apo parajsa, sepse ata tanimë e dinë shumë mirë se cilat gjëra mund të realizohen e cilat jo. Ata e dinë shumë mirë se cilat gjëra janë reale e cilat jo. Ndaj dëshiroj që kandidatët të mos premtojnë gjëra të kota”, ka thënë Lunaçek në një intervistë për “Dojçe Vele”.
Ajo më tej ka thënë se shpreson që fushata të kalojë në një atmosferë të qetë dhe bashkëpunimi, të mos ketë kërcënime apo akte të dhunshme.
E pyetur se a është me rëndësi për BE-në se kush do t’i fitojë zgjedhjet, Lunaçek ka thënë se nuk mund të jap sugjerime se për kë duhet të votohet.
“Por unë, Komisioni Evropian, Këshilli i Evropës dhe të gjithë në Bashkimin Evropian duan që zgjedhjet të kalojnë në një atmosferë paqësore dhe që drejtuesi i ardhshëm i qeverisë të ndjekë rrugën e integrimeve evropiane”, ka deklaruar Lunaçek. /tesheshi.com/
