Një vendim i beftë i Bashkisë së Tiranës mbi financimin e teatrit të ri kombëtar, ka rikthyer dhe njëherë reflektorët mediatikë në këtë vatër të nxehtë dhe me nuanca politike. Bashkia përcolli vendimin se financimi i teatrit të ri do jetë nga vetë ajo në bashkëpunim me qeverinë, që do të thotë pra se firma “Fusha”, ajo që do e financonte në këmbim të një territori për ndërtim, nuk do ishte derdhësja e milionave për këtë vepër.
“Komisioni i negocimit, në mbështetje të të gjitha kërkesave të komunitetit të artistëve për një teatër modern, i cili përmbush kriteret e nevojshme për realizimin profesional e me cilësi të shfaqjeve teatrale, nuk arriti të gjejë dakordësinë me palën private. Modeli financiar i propozuar nga pala private e interesuar për ndërtimin e godinës së Teatrit të ri Kombëtar dhe zhvillimit të zonës urbane, por edhe kompleksiteti i projektit, i cili duhet të përmbushte të gjitha kërkesat teknike të kërkuara nga përfaqësia e artistëve në komision, nuk mundësonte ndërtimin e godinës në një kohë të shpejtë dhe me infrastrukturë moderne për një teatër bashkëkohor.
Nisur nga interesi për të ndërtuar një godinë bashkëkohore dhe moderne, që plotëson të gjitha kushtet teknike për realizimin e shfaqjeve, e cila t’i shërbejë komunitetit artistik teatror dhe publikut artdashës, Qeveria dhe Bashkia e Tiranës vendosën që godina e re e Teatrit Kombëtar të ndërtohet nga shteti si një investim publik”, u tha në njoftim.
U reagua menjëherë nga ai komunitet artistësh që protestojnë kundër prishjes së të vjetrit, duke e marrë këtë si një sinjal tërheqjeje nga Bashkia e Qeveria. Por kryebashkiaku Veliaj sqaroi se nuk ka asnjë tërheqje.
“Komuniteti i artistëve jo-militantë kishte më shumë kërkesa teknike & kërkonte kalendar më të shpejtë punimesh se ç’ishte në gjendje të ofronte privati. Në këto kushte, qeveria shqiptare & @ Bashkia Tiranë do ta ndërtojnë vetë Teatrin e Ri- më shpejt e me gjithë teknologjitë extra për skenën”, shkruan Veliaj në twitter, duke ripublikaur dhe fotot e të riut. /tesheshi.com/
