Alavesi dhe Barcelona do të takohen në fund të majit në finalen e Kupës së Mbretit, por rezultati i sotëm nuk është aspak inkurajues për kundërshtarin e katalanasve.
Barcelona i ktheu reston Alavesit për atë humbje 1-2 më 10 shtator të vitit të shkuar në “Camp Nou”. E jo thjesht, por me një fitore 0-6 në “Estadio de Mendizorroza”.
Takimi i javës së 22-të së La Ligës thuajse nuk pati aspak histori, me Barcelonën që mbizotëroi në gjithçka, në gola, lojë, e në çdo statistikë tjetër.
Çdo shpresë nga vendasit për një rol pozitiv mori fund që në pjesën e parë, të mbyllur 0-2 për miqtë, që shënuan me anë të të zakonshmëve Suarez e Neymar.
Ndërsa në pjesën e dytë realizuan dhe Messi, Rakitic e rishtas Suarez, nuk mungoi dhe një autogol nga Alexis.
Barcelona mori përkohësisht vendin e parë, që mund ta mbajë së paku gjer në orët e vona të kësaj mbrëmjeje, kur Reali i Madridit të luajë ndaj Osasunës. /tesheshi.com/
