Ndërprerja e kampionatit duket se i ka bërë mirë Atletikos së Madridit. Pas dy barazimeve me dy skuadra debutuese, pas një loje anemike e vetëm një goli në 180 minuta, skuadra e Diego Simeone-s ka shpërthyer në transfertë.
Ndaj Selta Vigos, si skuadër udhëtuese, Atletiko ka fituar 0-4, duke u kthyer te paraqitjet e viteve të fundit.
Pavarësisht se një transfertë e vështirë tradicionalisht ajo në “Estadio de Balaidos”, Atletiko ka bërë më të mirën për ta lënë fushën me tre pikë.
Një pjesë e parë e mbyllur pa gola, e shoqëruar me një 45-minutësh të dytë ku shënohen katër të tillë nga udhëtuesit. Koke zhbllokon rezultatin në minutën e 53. Griezmann e tund më tutje dy herë rrjetën e portës vendase, dhe Correa vulos shifrat 0-4.
Një fitore e çmuar, tepër e rëndësishme, për Atletikon, që merr frymë lehtësisht. Ankthi duket të jetë lënë prapa!
E njëjta muzikë në “Santiago Bernabeu”, ku Reali hedh valle ndaj Osasunës.
Cristiano Ronaldo rikthehet të luajë pas dy muajsh, dhe i duhen vetëm gjashtë minuta që t’i gëzohet golit
të parë në sezonin e ri. Portugezi shënon, Reali kalon në epërsi.
Një gol i shënuar shumë shpejt, që i shkurajon lojtarët e Osasunës. Në pjesën e parë ka dhe dy gola të tjerë për Realin. Shënues janë Danilo dhe Sergio Ramos.
Ndërkohë që rezultati shkon në 5-0 me fillimin e pjesë së dytë, kur shënojnë Pepe e Modric, Osasuna kujtohet të luajë. Realizon dy herë, me anë të Riera-s dhe David Garcia-s. Roberto Torres humbet një 11-metërsh, e Bonnin e lë skuadrën me dhjetë lojtarë kur del me të kuqe.
Kështu Reali fiton 5-2 ndaj Osasunës, duke u ngjitur në kuotën e nëntë pikëve pas tre fitoreve në tre ndeshje.
Në mbrëmje pritet të luhet takimi Barcelona – Alaves, një pengesë lehtësisht e kalueshme në dukje për katalanasit. /tesheshi.com/
