Belgu Dries Mertens është njeriu i momentit te Napoli. Shtatë gola në pak ditë për sulmuesin që duket t’u ketë dhënë zgjidhje vështirësive të napolitanëve para portave kundërshtare.
Në fitoren 0-5 të Napolit një javë më parë ndaj Kaljarit, Mertens shënonte tre herë; katër janë golat e tij në takimin e sotëm në “San Paolo” ndaj Torinos.
Napoli fitoi këtë pasdite 5-3 ndaj Torinos dhe u ngjit në vend të tretë në renditje, duke zbritur më poshtë Milanin.
Nisja qe e vrullshme, ndërsa Mertens shënoi tre gola brenda 22 minutave të para. Një reagim i Torinos së shthurur do të vinte në pjesën e dytë, kur Belotti shkurtoi shifrat.
Dy realizime të tjera, nga një për secilën skuadër, do ta çonin rezultatin në 4-2. Pikërisht atëherë rishfaqet Mertens, që shënon me një goditje të përkryer, të dërguar në portë mbi kokën e portierit Hart. Goli i fundit i ndeshjes u shënua nga Iago Falque i Torinos, me 11-metërsh.
Kjo ishte fitorja e dhjetë e Napolit në 17 javë kampionat. Edhe pse Higuain u largua në verë drejt Juventusit, edhe pse polaku Milik u dëmtua, Napoli ka shënuar më shumë se çdo skuadër tjetër: plot 37 gola, një më shumë se Juventusi dhe Roma. /tesheshi.com/
