Një kontrast të jashtëzakonshëm kanë patur dy ndeshjet e mbrëmshme në Champions League nga ato të një nate më parë. Asnjë gol në dy takimet e së martës, dhjetë gola në ato të së mërkurës. E veç kësaj, një spektakël e një përmbysje e jashtëzakonshme në sfidën Bajern i Mynihut – Juventus.
Për t’u mbajtur mend është ky takim. 2-2 në 90 minutat e para, e po kaq në të dytat. Përmbysje e madhe e Juventusit në takimin e parë, e po përmbysje e madhe e Bajernit në të dytin.
Juventusi e nisi vrullshëm ballafaqimin në “Allianz Arena”, e kryesoi 0-2 pas 28 minutash, me golat të shënuar nga Pogba dhe Cuadrado. Rrëmeti gjerman nisi pas minutës së 73-të, kur Lewandowski ngushton diferencën. Në të 91-tën, Müller barazon shifrat. E në shtesë fjalën e marrin Thiago Alcantara dhe Coman, që e çojnë rezultatin në 4-2 për bavarezët.
Bajerni shkruan emrin në çerekfinalet e Champion s League-s pas një ndeshjeje vërtet të çmendur. Ja ç’thotë pas ndeshjes Guardiola, trajneri spanjoll i bavarezëve: “Ne luajtëm dhe fituam kundër një prej finalistëve të sezonit të shkuar. Shënuam katër gola kundër një ekipi italian. Dhe tani jemi në çerekfinale. Urime lojtarëve të mi, por gjithashtu dhe Juventusit.”
Në përballjen tjetër, Barcelona fitoi për të dytën herën ndaj Arsenalit. 0-2 pati përfunduar takimi i parë për katalanasit, 3-1 u mbyll ai mbrëmë.
Fjalët e teknikut të topçinjve, Wenger-it, e përshkruajnë më së mirë atë që ndodhi: “Luajtëm kundër një
ekipi me tre sulmuesit më të mirë që unë kam parë ndonjëherë, e pabesueshme. Ata mund të krijojnë një rast nga asgjëja. Barcelona ka tre lojtarë që e shndërrojnë jetën e çdo dite në art. Ishte një natë me futboll të madh.”
Për ta parë më nga afër takimin, Neymar i kaloi në epërsi katalanasit në minutën e 18-të. Miqtë londinezë zgjohen me fillimin e pjesës së dytë, dhe barazojnë në minutën e 51-të, me golin e Nenny-t. Rasti i çuar dëm nga Welbeck jo shumë minuta më pas është pika e kthesës. Luis Suarez tund rrjetën e Arsenalit me një ekzekutim të përsosur dhe u jep fund dilemave. Në fund ka një gol dhe për argjentinasin. Messi vulos shifrat 3-1 në minutën e 88-të.
Barcelona shkon në çerekfinale për të nëntin vit radhazi. Një arritje për t’u admiruar. /tesheshi.com/
