Akuzat se Partia Demokratike po lobon kundër hapjes së negociatave, Lulzim Basha, i cilësoi tentativë të mazhorancës për të tërhequr vëmendjen nga situata emergjente që sipas tij ndodhet vendi. Basha tha se Brukselit nuk i është kërkuar asgjë më shumë sesa plotësimin e pesë kritereve të Bashkimit Evropian, zbatimin e dekriminalizimit dhe reformën zgjedhore.
Basha: Këto janë qëndrime të njohura të Bashkimit Evropian, janë qëndrime të njohura të opozitës në interesin publik të qytetarëve. Gjithçka tjetër është manovër për t’i hedhur hi syve qytetarëve dhe për të hequr vëmendjen nga dështimi i Edi Ramës.
Kështu u shpreh kryetari i Partisë Demokratike, Lulzim Basha pas takimit që zhvilloi me unionin e ekspertëve mjedisorë shqiptarë me të cilët diskutoi në lidhje me importin e mbetjeve, ndërsa ka shprehur dhe një hërë vendosmërinë e opozitës kundër ligjit. Shoqëria Civile ka thirrur me 15 nëntor para Kryeministrisë një protestë kundër ligjit të mbetjeve.
